"يا سيّدى المُنتخب.. قبل اليمين.. سَمّى" قصيدة لسعيد شحاتة

يا سيّدى المنتخب
..لو كنت جاى للنّخب
......... يبقى الكلام ضايع
..........
...............
عُمر المحفلط والمزفلط
...........وابن بيّاع الضمير
............. ما يقيم شرايع
الثورة كانت جامعة...
........... والدمّ اللى سال
ما فَرقْش بين جاهل
................ ودكتورة نسا
................ ودبلوم صنايع
الدّم عل الأسفلت
............. أغلى من الودايع
فستان حبيبتى اللى اتمزع
برصاصة القنّاص وبعيون النطايع
فوق جسمها
.........فى الجنّة بيرصّ الرفايع
والروح فى أركان الميدان
........ بتصلّى بعيونها الوسايع
وبتقرا سفر النصر
وتجوّد فى سورة مصر
وبترفض أمام القصر تسعى
............. ودمّها ع الأرض شايع
الدمّ دمّ الناس
وناسنا الطيبين مش كلّهم
.......................... عاطل وصايع
الدمّ دمّ الناس
وناسنا الطيبين مش كلّهم
.......................... سقّف وبايع
......................
يا سيّدى المنتخب
...قبل اليمين حاسب
كل المكاسب خساير
........ لمّا تتحاسب
يا سيّدى المنتخب
.. قبل اليمين سمّى
واتهجى مصر ببراءة
وصون شيلان أمّى
..................
يا سيّدى المنتخب
...... صوت الغُناى عالى
........... صوت الغلابة ضعيف
لو كنت جاى للنّخب
........ بيع مصر بالغالى
............. وخلّيك خفيف الطيف
واضحك فى وش الفقير
.......... واتمشّى طوّالى
........... علشان نقول كان ضيف
....................
يا سيّدى المنتخب
... لو كنت جاى للنّخب
........... يبقى الطريق ملعون
وان قالوا شعر بغزل
........... فأكيد ماهوش موزون
لا أنت الإله الحلاوة
................. ولا أنت إيد الهُون
ولا كنت ربّ الغنم
................ ولا مجمل المضمون
فإياك فى لحظة يمينك
............. تنسى فضل الناس
وإياك تقف ضد موسى
................... بدبابات فرعون
..........................
... لو كنت جاى للنّخب
شعبك ما هوش ناقص
البيض وقف ينتظر
...والقشر مش فاقس
والطقس جوّا القلوب
بيقول ما نيش طاقس
وان كنت هتقول خطب
.. والنعمة ما أنا راقص
.......................
يا سيّدى المنتخب
... لو كنت جاى للنّخب
................. نخبتنا بيّاعه
أكّالة لحم البشر
............ ومحكّمة الباعة
والدنيا قدّام عنيها
.............. تساوى ولاعة
وإن كان عليها بصراحه
.......... استنى عند الباب
النخبة عايزة الرئيس يحكم
.............. يحكمنا بالساعة
.................
.. لو كنت جاى للنّخب
سلّم وفوت على طول
علشان أكيد مش هتكتب
.............. قايمة العرسان
ولا يوم هتدفع عشانها
.......... فاتورة المحمول
وإن كنت جاى للغلابة
....... اتوصى بالمحلول
لسّه الغلابة ف بلدنا
...... بيرسموك إنسان
وبيحلموا معاك ببكرة
......... ونُصّ شقّة فول