هناك قبلى
تشوف الصٌحبة واللمة
ودفء اللحظة والضمة
وطيبة قلب
وود وحب
أيدين تبنى وبتعمر
ولا تدمر
ومش بتخاف
لكن بتحس بالصادق
من الخاين
وبتفرق ما بين الأصلي
والتزييييييييييف
وبين اللص
واللى شريف
هناك قبلي
وقلبى هناك
وفرحه باصة م الشباك
وابصلها
وتيجى عيونى ف عيونها
يٌدق القلب
تدوب هى
ولا تدارى
فاسيب دارى
وأروح دارها
وأكمل دينى بحنانها
ويتجمع شباب الأهل
وتطلع أحلى زغرودة
ودا يبارك ودا يهنى
ودا أدعيله حصلنى
يقولى أميين
وتتجمع بنات الأهل
ودا يغنى ودا يشيلنى
وكل الأهل تتشارك
ونرقص رقصة العشاق
ونملا قلوبنا بالأشواق
ودا يبوسنى ودا ودى تحَنى
وأمى ف لحظة تحضنى
وتهمس ليا ف وصاية
ف ننى عنيك تخبيها
وأوعى ف مره تأذيها
وم الأيام هاتحميها
وانتى يا بنتى خليله
حياتكم حب واديلة
حنانك تاخدى نور عينه
وخافى عليه وعلى عيالك
تلاقى الخيرما بين دارك
هناك قِبلى
همومنا ف الجموع فرحة
ما بين الأهل والصحبة
بتتدارى الهموم ف القلب
هناك قِبلى ياخدنى حنين
واقوله يا قلبى رايح فين
صحيح عايش
لكنه حزين
هناك قِبلي
وقَلبى معاك
يا قطر الحب خدنى معاك
صورة أرشيفية
مشاركة
اضف تعليقاً واقرأ تعليقات القراء
مشاركة
لا توجد تعليقات على الخبر
تم أضافة تعليقك سوف يظهر بعد المراجعة