محمد عمر يكتب: حِلوة ابتسامتِك

قد إيه حلوة ابتسامتِك
لمّا بتنوَّر فى وِشِّك
قد إيه بتزيد فى حُسنِك...
كُل حُسن بيبقَى صورتِك

لما تبتسمى ...خدودِك
فيها بتفتّح ورود
النسيم يشتاق يبوسِك
و العبير من غير حُدود

لما تبتسمى.. شفايفِك
يبقوا أحلى كَرزتين
لما اشوفهم ببقى شايفِ
فيكى أجمل جنتين

لما تبتسمى عينيكى
منها يطلع أحلى نور
يفرش الكون حواليكى
والنهار يفضَل شهور


لما تبتسمى ابتسامتِك
فى حاجات تحصل كتير
تستخبّى الشمس مِنِّك
والقمر مِنَّك يغير

ابتسامتك سِحر ساحِر
بيها تتعلَّق قلوب
لما أشوفها ببقى شاعر
فيكى بَتغزِّل وادوب

ابتسامتك دى تِخلّى
كل حاجة ف عينى حِلوة
ألقى كل الكون يغنّى
تبقى كل الدنيا غِنوة .