م. مجدى عزيز يكتب: الله عليك

هلا هالله عليك يا مشير
هلا هالله عليك يا كبير
عديت الخطوة الأولى
وفيه لسه خطاوى كتير
نبدأها سوا مع بعض
بصلاتنا وبالتكبير
والناى على كيفه يغنى
مواويلنا مع المزامير
والعالم كله بيرصد
طريقتنا فى التعبير
إحنا معاك هانساعد
بينا ياللا إلى التغيير
إحنا وراك بنساند
بينا ياللا إلى التعمير
خلّى العاطل يكدح
خلّى الكل يغير
والإيد الرخوة بلاها
دى بلدنا كلها خير
محتاجة إيدين ترعاها
تديها من غير تقصير
من رزق بلدنا هناكل
والفايض للتصدير
ولا حد يمّن علينا
ولا نسمح بالتعيير
صبرنا سنين وسنين
ع الظلم وع التكدير
وأهو جاك الوقت يا مصرى
آهو دا زمن التنوير
ونصيحة الوقتى يا سيدى
راح أقولها بدون تفكير
الشعب استبشر بيك
واتأمل فيك الخير
والناس خرجت فى الحرّ
وانتخبك جمع غفير
عجوز وشباب أعطاك
صوته مع التقدير
والنسوة كمان وكمان
رقصت على بشرة خير
رد جميله يا سيدى
خليك للشعب نصير
تصون العهد يصونك
ويساعدك ع التطوير
هاتزود فى المعاناة
يطلعلك ع التحرير