محمد دويدار يكتب: ابحث عن ماما أمريكا

مساء الفل يا عرب.. إزاى الحال دلوقتى.. هل وضحت الرؤية.. أظنها لم تكتمل وضوحًا بعد.. بتسألوا مين داعش أقولكم أنا.. داعش دى.... امممم.. والله ماعارف أقولكم إيه أصلى معرفش أنا كمان مين دول.. طيب ماتيجى نسأل أنا وأنتم حد يكون بيفهم عننا.. يا أستاذ يا هانم يا دكتور يا بشمهندس يا ناشط يا سياسى.. يا خبير استراتيجى يا مثقفين يا عالم ياهوه... مين داعش دول؟ وتلاقى ألف جواب وكلام كتير ملهوش دعوة ببعض لكن فى النهاية ماحدش عارف بالتحديد مين دول ناس تقول إرهابيين.. معقولة! وناس تقول دول جيش الشهيد صدام... يالهوى! .. وناس يقولولك بعد تحديق وتفحص وتأمل دول بأة ثوار أحرار هيكملوا المشوار.. أيووووون أنت جيت عالجرح يا عم الحج.. تكسب معانا هى دى الإجابة الصح بس الأول تعرف إنهى مشوار اللى هيكملوه ولا جاوبت بالصدفة؟.. يا سادة بالفعل هم يكملون نفس المشوار الذى بدأت أمريكا تنفيذه فى يناير 2011 والتخطيط له منذ عام 2001 بعد سبتمبر الأسود علينا كلنا.. إنه مخطط الفوضى الخلاقة التى لم تستح أمريكا ولم تستنصح وتدارى عليه حتى من باب دارى على شمعتك تقيد.. لكنها ملأت الدنيا حديثًا عنه فسمعه واستوعبه العالم كله إلا نحن فنحن شعوب لا تفهم إلا فى الجنس والأكل فقط.. ماعلينا والمهم إن ماما أمريكا بعد أن استعصى عليها فتح مصر.. أدركت أنه لا بديل عن طريق آخر تسلكه حتى تحاوطنا من كل الجهات وتدخل مصر مرة ثانية بسهولة ويسر فكان اختيار طريق رأس العراق الصالح.. إنها يا سادة نفس الطريقة ونفس الفوضى ولكن بشكل أعنف ومخيف.. فدعهم يكيدون ويفكرون ويمكرون فإن الله خير الماكرين.. فقط اعلموا قاعدة هامة جدا.. أن وراء كل مصيبة لا تبحث عن المرأة ولكن ابحث عن ماما أمريكا.