هى ليه اتغيرت طعم البيوت؟
مابقاش بنسمع فيها صوت
ولا حتى حاسين بالدفا.....
مين علم الضحكة السكوت!
وبقينا نضحكها ف خفا....
وبقينا بنام بردانين....
أنفاسنا راحت فيها فين
هى اللى سجن ومسجونين
ولا احنا إحساسنا اختفى
قنديل مشاعر وانطفى
والضلمة سكنت ف الضلوع
مابقتش تحضنا بـ وفا
يا حضن دارنا اللى اتولد فيك حلمنا
وتملى كنت تلمنا....ما بقتش ليه بتضمنا
ولا حتى بنشوف طبطبة
كنت إما تزعل مننا ...تطلع تنام عـ المصطبة
وبرده تفضل جنبنا..............
مين اللى فرق جمعنا......خلى العيون متغربة
مين اللى فينا مش هنا؟
مين اللى فينا من هنا ومين الغريب؟
ببان أوضنا المفتوحين على بعضها اتكست علينا
وبقينا بنسميها عيب
لو كان نصيبنا ف الصبا
نفضل سوا ونكبر تفرقنا الحياة....معلش يا جناب النصيب
أفضل هناك...واحنا اللى نفضل من هنا
وحشانى طقطقة الخشب....وهو غضبان م اللهب
براده شاينا اللى اتقلب.... لما بـ أحاول أعدله
ليه كل شىء...بيبقى حلو ف أوله؟
وف آخره باخ..............
عود البنفسج لما فتح كان بيضحك م الدفا
ليه بعد مدة قصيرة بنشوفه شاخ؟
ليه حلمنا نفضل هنا ....فشلنا حتى نكمله
واتغربت فيه الأمانى لما داخ
بقى طير دبيح م الغربة بايخ
طعم البيوت.....
مابقاش صحيح طعم البيوت...طعمه البيوت بقى طعمه ماسخ
صورة أرشيفية
مشاركة
اضف تعليقاً واقرأ تعليقات القراء
مشاركة
