بفتكر أيام زمان
وافتكر حِلمى البرىء
وافتكر نفس المكان
اللى كان أكبر صديق
ضحكة البنت والشقاوة
جدتى وأمى وصُحابي
القلوب مفيهاش أساوة
والأيدين كانت تدادى
صوت حليم والست ثومة
والنشيد عن صوت بلادى
ف المدارس كنا نهتف
صوت بيعلى ومن فؤادى
بفتكر مريلتى دايمًا
وافتكر شنطة كتابى
وافتكر أول مُدرس
كان قريب زى صُحابي
وافتكر واحد وخمسة
كان ساعتها بيدى ستة
ع الكفوف بنعد كٌنا
وان غلطنا دى تبقى ورطة
وافتكر طمطم وبوجى
ماما نجوى وتوم وجيرى
وافتكر فاتن وشادية
أما سوسو فى ننى عينى
وافتكر كعبول وماجد
وافتكر أستاذنا أيمن
والأمانى والأغانى
كنت بستناها دايمًا
وافتكر لعب الشوارع
كوره استغماية بِلي
كٌنا نلعب مش بنشبع
والحياة مليانة ضى
وافتكر مدفع صيامى
والأيمان فى القلب يكبر
وافتكر لحظة قيامى
خير بزايد كان بيكتر
وافتكر لبسى الجديد
كل عيد والدنيا فرحة
لما أكون إنسان سعيد
طير مسافر دنيا سارحة
بفتكر أيام زمان
وافتكر حلمى البرىء
وافتكر كل اللى راح
واللى جوا ف قلبى شيء
شيء بيكبر كان براح
كان قريب وقت ضيق
وافتكر أيام زمان
وافتكر حلمى البرىء
صورة أرشيفية
مشاركة
اضف تعليقاً واقرأ تعليقات القراء
مشاركة
لا توجد تعليقات على الخبر
تم أضافة تعليقك سوف يظهر بعد المراجعة