روشتة "فيسبوكية" للفتيات لمواجهة التحرش الجنسى: استخدمى البجاحة وعلى صوتك.. وشيلى سلاح أو إليكترك.. واعدلى مشيتك وخففى المكياج.. ووصفة سحرية لصناعة "سبراى" لاستخدامه وقت الضرورة فى وجه المجرمين

دشن نشطاء على مواقع التواصل الاجتماعى "فيس بوك"، "تويتر"، مبادرات لمواجهة التحرش الجنسى، فى شوارع مصر، وذلك رداً على ما قام به مجموعة من الشباب، ليلة أمس الأول، بالتحرش بمجموعة من الفتيات فى ميدان التحرير.

وقدم رواد المواقع الحلول والأساليب، التى تتمكن بها الفتاة من مواجهة المتحرشين، عبر هاشتاجات "لا للتحرش"، "قطع إيدك"، "التحرش جريمة لا تغتفر"، كما قدمت صفحة ما تعيشه المرأة فى المجتمع الشرقى، بعضاً من الحلول والنصائح للفتيات، ومنها: "أولا البجاحة- يعنى لما حد يقولك كلمة أو لفظ يضايقك أقفى وبجحى فى وشه وميهمكيش منه خليه يكرر الكلمة تانى ولو قالها ارزعيه بالبوكس فى عينه وصوتى".

الأمر الثانى فى مواجهة التحرش، هو حمل الفتاة لسلاح، حيث قالت الصفحة، "خلى دايما معاكى حاجة زى إلكتريك شوك أو سلاح صغير، مطواه بقى قصافة مبرد أى حاجة المهم تكون سهلة إنك تمسكيها وتكون فمكان قريب من إيدك فالشنطة أو فجيبك ده لو مبتعرفيش تضربى بإيدك".

استخدام الصوت العالى أمام الشخص المتحرش، كان بمثابة حل ضمنى لمواجهة المتحرشين، "الصوت العالى - طول ما صوتك عالى الحيوان هيخاف ومش هيعرف يرد عليكى".

كما نصحت الصفحة بتجنب خروج أى ألفاظ نابية من قبل الفتاة مهما كان الأمر، حتى لا يغرر بها الشخص المتحرش: "اوعى تشتمى بأى لفظ عشان الناس اللى حواليكى متقولش إنك إنتى اللى ابتديتى وغير كده فى ولاد لسانها أزبل من صفايح الزبالة هيشتمك ومش هتعرفى تتكلمي".

كما شدد النشطاء والصفحة على ضرورة تجنب الفتيات للملابس المثيرة، التى تثير غريزة الشباب، وتخفيف "الميكياج"، والمشى بطريقة مستقيمة، "اعدلى مشيتك خفى مكياجك وطى صوتك".

كما نصحت الصفحة بطريقة عمل "سبراى" لاستخدامه وقت اللزوم، وشرحت طريقة عمله فى المنزل بطريقة سهلة وميسرة، حيث تتضمن المرحلة الأولى، وهى مرحلة التركيب، "هتجيبى برطمان عسل أو مربى حجم صغير أو أى عبوة تكون فتحتها كبيرة ومحكمة الغلق، هنحط لغاية التلت خل والتلت التانى هنحط كحل طبى (سبرتو أبيض) بينباع فى كل الصيدليات".

المرحلة الثانية، "بعد كده هتحطى معلقة شطة كبيرة (وياريت تكون شطة حارة مش من المضروبة) ومعلقة كبيرة فلفل أسمر، ولو عندك فلفل الشطة الأحمر مفيش مانع نخرطه قطع صغيرة وتضيفها للخليط كمان لو فى جنزبيل يكون أفضل ونضيف منه معلقة كبيرة أيضا، لكن احنا بنختار أسهل المكونات".

وتابعت الصفحة، "نقفل البرطمان بإحكام ولازم يكون البرطمان بيقفل كويس زى ما قولنا فى الأول وابدأ بعمل رج خفيف للمكونات لمدة دقائق ونتأكد أن الخليط اتمزج تماما، بعد كده هنسيب الخليط كم ساعة على جنب وكده أصبح جاهز، فى حالة لمس المزيج الجلد أو الأصابع يجب غسلها بالماء وعدم فرك العين حتى يتم التخلص من المزيج فى الأصابع".

المرحلة التانية مرحلة التعبئة، "يفضل ارتداء جوانتى قبل كل شيء ولو مش موجود ياريت تحطى كيس بلاستك حوالين ايديكى كأنه جوانتى واحذرى ان المكونات تدخل فى عنيكى أو إنها تنزل على الإيد بعد كده تغلطى وتمسحى عنيكى ياريت ناخد بالنا من الأخطاء الصغيرة دى لأنها ممكن تكون خطيرة، ونصيحة ياريت لو حد عنده مشاكل فى الصدر ميعملش التجربة بنفسه لأن ريحة المزيج نفاذة جدا".

وقالت الصفحة، "بعد كده هتجيبى بخاخ زى اللى فى الصورة سواء كان عندك برفان وفضى أو ممكن تشتريه من عند بتوع تركيب العطور المهم يكون بخاخ قابل للفك والتركيب".

وواصلت "ودلوقتى هتجيب البرطمان اللى فيه المزيج وهتفتحه وتغطى الفتحة بتاعته بشاش أو أى قطعة قماش تشبه الشاش فى التركيب بس المهم تتشد على فتحة البرطمان بحيث تكون مصفاة للمزيج وتقوم بنقل المزيج فى برطمان أو أى كوباية تانية، أو ممكن إنت تقوم بالتصفية بأى أسلوب تانى يعجبك سواء تجيب مصفاة من عندك أو بأى وسيلة تانية المهم المزيج يكون صافى تماما من كل البهارات، بعد كده هنجيب قمع او اى حاجة تشبهه او حتى نجيب ورقة كرتون مقوى ونعمله على شكل قرطاس او قمع ونقوم بنقل المزيج إلى البخاخ وبكده اصبح جاهز للاستخدام".

أما عن كيفية الاستخدام، قالت الصفحة، "عادةً أى بلطجى أو مغتصب بيقوم بتعقب الضحية قبل تحديد وقت الهجوم الإسبراى هيكون فى شنطتك زى الموبايل لو حسيتى بأى ملاحقة أو سلوك غريب من حد مثير للقلق خلى الإسبراى جاهز لكن مستخبى وغير واضح سواء فى شنطة اليد أو فى الجيب والسبابة تكون على الضاغط ومع اول لمسة او اقتراب من الشخص، استدارة سريعة واستهداف للعين".