مطالب الأطفال المصريين من "السيسى": حاجات حلوة.. وأمن وأمان..ولعب.. ومدرسة نظيفة ومافيهاش ضرب.. وماحدش يموت.. بدلة جيش أحسن من أمريكا

بسنوات عمرهم القليلة يعرفون بالكاد رئيس الجمهورية، ولم يكونوا ليعرفوه لولا الأحداث التى فرضت على الكثير منهم أن يعرفوا قبل الأوان، ويشتركون بشكل أو بآخر فى الحراك السياسى.

أطفال فى مثل سنهم شاركوا فى الانتخابات الرئاسية والاحتفالات التى اتسمت بها، فماذا يطلبون هم من الرئيس؟ وما التغيير الذى يأملون أن يحدثه فى مصر؟.

"عمر محمود فارس" (13 عامًا) من المنصورة: "بحلم إنى لما أكبر ألاقى شغلانة محترمة فى نفس مجال دراستى، ونفسى ما يبقاش فى مصر أطفال شوراع ولا شحاتين ولا ظلم".

" دينا محمد حسين القادرى" من الشرقية يبلغ عمرها 4 سنوات ونصف: "نفسى الحضانة بتاعتى تبقى حلوة ويكون فيها ألعاب كتير وعجلة سبق، وأعمل عيد ميلادى وأجيب تورتة سبونج بوب".

"حبيبة محمد عادل" تعيش فى منطقة 6 أكتوبر وتبلغ من العمر 6 سنوات: "نفسى الرئيس يحمينى أنا وبابا وماما وأصحابى ومدرساتى والمدرسة بتاعتى".

عبد الستار محمود (١٣ عامًا) ميكانكى وطالب فى مدرسة بإمبابة: "نفسى فى تعليم كويس ومدرسين ما يضربونيش لو ماخدتش عندهم درس خصوصى، والشوارع تنضف من الزبالة، ووالدتى تتثبت فى شغلها علشان تطمن، وتاخد مرتب كويس".

"زينب محمود" ذات الثمانية أعوام، تستعد لدخول الصف الثالث الابتدائى، بمدرسة قومية العجوزة الخاصة: "نفسى كل فقير يبقى عنده بيت وما يبقاش فى أطفال شوراع ولا أطفال بتشحت، ونفسى حد يساعدنى أتعلم الرسم فى المدرسة ولما أكبر أبقى فنانة والبلد تكرمنى".

"عمر محمد أحمد" ٩ سنوات من المهندسين: "نفسى مصر تبقى حلوة، ولما أكبر وأبقى دكتور زى بابا أخد حقى فيها وما أحتجش أسافر وأسيب البلد عشان أقدر أعيش كويس، وعايز كمان المدرسة تبقى كويسة عشان أنا فى مدرسة خاصة وبرضو ما بتعلمش كويس، وعايز ولادى لما أكبر يبقوا كلهم فى مصر ونعيش مع بعض مش كل واحد يبقى فى بلد".

"أحمد علام" ٧ سنوات ويستعد لدخول عامه الثانى الابتدائى: "عايز الرئيس يخلى مصر أحسن بلد فى العالم، ونبقى أحسن من أمريكا، ونفسى الرئيس الجاى يصلح الزحمة ويخليها مش موجودة، ويخلى بلدنا أجمل فى كل حاجة عشان إحنا مش أقل من أمريكا".

" ياسر على 13 سنة من مصر القديمة": "نفسى أتعلم كويس ومدرستى يبقى فيها كمبيوتر ومراجيح، والمدرسين يخلونى أحب المدرسة، وبابا وماما قالولى إن كل الحاجات دى مش هتحصل إلا لو كان رئيس مصر راجل بطل يقدر يصلح كل الحاجات الوحشة اللى فى مصر".

"على محمد سيد 12 سنة من فيصل: "أنا عايز رئيس مصر يخلينا نعيش من غير المشاكل اللى كل شوية نشوفها فى التليفزيون، إخوان وثوار وخناقات وتفجيرات، نفسى بلدى تبقى أحسن وأهدى بلد فى الدنيا، ونعيش من غير ما نخاف من حاجة، وده مش هيحصل غير لما الشرطة والجيش يرجعوا زى الأول ويحمونا ويقضوا على كل الناس المجرمين".

" مصطفى مجدى 10 سنوات من السيدة زينب: "نفسى ما لاقيش كل يوم صورة واحد محطوط عليها الشريط الأسود، ولما أسأل بابا يقولى أصله شهيد، وأشوف أهله وباباه ومامته بيعيطوا وزعلانين، وأنا أفضل أعيط، أنا عايز محدش يموت فى مصر".

"هاجر محمد 9 سنين من فم الخليج: "نفسى أنزل الشارع من غير ما ماما تقولى ماينفعش تنزلى لوحدك، علشان فى مجرمين بيخطفوا الأطفال ويعذبوهم ويغتصبوهم، أنا بقيت أخاف أروح فى أى مكان لوحدى، وكل اللى عايزاه من الرئيس إنه يخلينى أروح فى كل حتة لوحدى من غير ما أخاف".

"محمد صبرى" 11 عامًا، يعيش فى السعودية: "عايز أرجع مصر وألاقى مستوى التعليم والنشاطات الرياضية والفنية زى اللى موجودة فى السعودية، علشان زى ما أنا فرحان إن مصر بلدى أفتخر بها قدام كل أصحابى فى المدرسة، وأقولهم إن مصر كمان بتهتم بأطفالها وإن الرئيس الجديد هيرجع كل الناس اللى مسافرين وهيوفر لهم كل حاجة حلوة بيلاقوها بره".

"أحمد طارق 10 سنوات من مصر القديمة: "أنا عايز الرئيس يخلى المدارس الحكومية زى المدارس الخاصة وما يكونش فى فرق خالص، يعنى كل الطلبة يقدروا يتكلموا لغات إنجليزى وفرنساوى وكمان العربى يبقى كويس جدًا لأن دى لغتنا ولغة القرآن، وعايز الوزارة متفرقش ما بين الطلبة اللى بيتعلموا بفلوس أو من غير فلوس".

"يوسف عبد العظيم (10 سنوات) من السيدة زينب: "كل حلمى إن أنا وأخويا "أحمد" لما نعيا نلاقى مستشفى حلوة نتعالج فيها، ونلاقى خروجات من غير فلوس كتير، نتعلم وننبسط فيها، ومش لازم نستنى أول الشهر علشان نخرج، نفسى يبقى فى أندية مخصصة للأطفال تنمى مواهبنا فى كل المجالات ومن غير اشتراكات كبيرة".

" ملك هانى حسن 9 سنوات من الدقى:"نفسى الرئيس يخلى الناس تقدر مواهب الأطفال ويساعدونا لما نكبر ننجح ونحقق نفسنا زى ما بيعملوا بره، أنا مامتى روسية ولما بسافر بيقدرونى جدًا لأنى راقصة باليه موهوبة نفسى السيسى يخلى الناس يقدرونا فى مصر".

"محمد على 13 سنة من منطقة السكر والليمون بمصر القديمة: "أنا بقول للسيسى مش عايز أشوف ولا طفل متبهدل زيى وبيشتغل من صغره، أنا ميكانيكى وبسعى على أكل عيش أسرتى كلها، ولو كانت والدتى لقت معاش من البلد مكنتش اضطريت أسيب مدرستى وأشتغل وأحس بالنقص وسط الأطفال اللى بيعرفوا يقروا ويكتبوا ويتكلموا لغات وأنا حتى مبعرفش أفك الخط".

" مازن طارق 14 سنة من مدينة نصر:"أنا عايز يكون للطفل مكان فى الحياة السياسية، لأن محدش يقدر يعبر وينقل مشكالنا غير حد مننا، إحنا اكتر ناس حاسين بالحاجات اللى بيعانى منها الطفل فى مصر، سواء التعليم أو الفنون والنشاطات، فليه ميكونش فى طفل بالنيابة عننا يتكلم باسمنا وطبعا يكون طفل كبير ويقدر يقوم بالمهمة دى".

أربع سنوات ونصف هو سن فريدة أحمد السواح أصغر مؤيدة للسيسى فى الشرقية، والتى لخصت أحلامها ومطالبها من الرئيس القادم فى "أنا فرحانة إن السيسى كسب ومرسى اللى بيقطع النور مشى، أنا عايزة من السيسى أى حاجة حلوة ممكن كيس شيبسى أو أى حاجة يعنى حلوة وكمان عايزة طيارة من عند السيسى أروح بيها لبابا فى السعودية".

عبد الرحمن محمد من الجيزة يبلغ من العمر 13 عاما يقول ببراءة: "لو سمحت يا سيسى أنا عايز بلدنا تبقى كويسة وحلوة بصراحة عايزها تكون شبه دبى عايز أمشى فى الشارع ومايكونش فى حد بيشتم فى حد ولا حد بيتكلم بطريقة وحشة".

"نورالدين حمزة" 8 سنوات، من الدقى: "أنا عايز الشوارع تبقى نضيفة وشكلها حلو والزبالة تتشال منها وكمان ميكونش فى شحاتين قاعدين فى كل مكان كده ولما أكبر عايز السيسى يخلينى أبقى زيه فى الجيش كده".

لمى وليد "7سنوات" من منطقة الحناوى بالشرقية: "أنا نفسى السيسى يكون كويس معانا ويحمينا على طول زى ما حمانا قبل كده من الإخوان، ونفسى يخلى البلد أحسن ونفسى يخلى البلد حلوة من غير ناس وحشة تزعق فى الشارع وتقل أدبها وتقول ألفاظ وحشة".

زينة وليد عبد الرحمن من "الشرقية": "نفسى فى حاجات كتير قوى من الرئيس الجديد أولها إن البلد تكون نضيفة والبيوت شكلها حلو ومدهونة من بره كلها بلون واحد زى البلاد اللى بره، وكمان نفسى يكون فى "مولات" وأماكن كتير حلوة نعرف نتفسح فيها".

"جنا أشرف" 7 سنوات من "المعادى": "نفسى السيسى يخلى النور يجى عشان أطلع شقتنا فى الأسانسير مش على السلم، ونفسى كمان الشوارع تبقى حلوة ومفيهاش خناقات ولا أى ناس وحشة".

آلاء لاشين 9 سنوات من القومية: "أنا نفسى بلدى تكون كويسة ومفيش ناس وحشة فى البلد بتخرب فيها عايزة كمان أخرج واتفسح فى أماكن كتير تكون حلوة، وأهم حاجة فى بنت فى قناة كراميش بتغنى حلو عايزاها تغنيلى فى البيت لوحدى".

محمد ياسر خمس سنوات "الشرقية": "أنا نفسى تكون البلد حلوة وشكلها نضيف زى ما بشوف فى التليفزيون وما يكونش فيها خناقات وكمان عايز المدرسة تكون نضيفة وحلوة وفيها مكان ألعب فيه مع أصحابى ومش عايز المدرس يضربنى".

ليلى وجدى أربع سنوات ونصف من"الهرم": "أنا عايزة تاب يكون لونه أحمر بس يكون حقيقى مش لعبة عشان ألعب فيه زى ما أنا عايزة، وكمان مش عايزة النور يقطع تانى عشان أتفرج على الكارتون اللى أنا بحبه".

رودينة مختار عبد الله أربع سنوات "ديرب نجم": "أنا رحت انتخبت السيسى عشان عايزاه يجيبلى بدلة زى اللى كان بيبلبسها وهو بيطلع فى التليفزيون عشان ألبسها وأخرج بيها مع أصحابى عشان أنا بحب لبس الجيش، وكمان عايزاه يجيبلى لعبة حلوة كبيرة".

"ياسين محمد عبدالعزيز زايد" فى الصف الثانى الابتدائى، من المعادى: "نفسى ما أخافش على بابا لأنه بيشتغل ضابط شركة، خايف حد يموته زى أصحابه الضباط، ونفسى الرئيس ياخد كل الحرامية اللى فى الشارع علشان أعرف ألعب براحتى، وعلشان بخاف على أختى الصغيرة ومامتى إن حد يضايقهم، ونفسى النور ما يقطعش علشان بخاف الأسانسير يقف بيا أنا وأخواتى ومامتى ونموت"

سويبة محمد لاشين خمس سنوات من "الشرقية": "أنا نفسى السيسى يخلينى شجاعة جدًا وبروح المدرسة من غير ما أخاف لأنى بخاف قوى، وكمان نفسى ألعب بالألعاب فى الملاهى من غير ما أجرى واستخبى فى بابا وماما، عايزة أكون شجاعة زيه هو حارب الناس الوحشة وعشان كده بحبه".

يوسف أحمد 9 سنوات: "أنا عايز السيسى يخلى التعليم كويس زى فى البلاد الحلوة اللى حوالينا وكمان المدارس تكون نضيفة والحمامات بتاعت المدرسة تكون حلوة وبتتنضف على طول مش زى ما هى كده وحشة وبنقرف ندخلها، وكمان عايز مصر تبقى حلوة قوى أحسن بلد فى الدنيا".

" رنا محمد مجاهد" 12 عامًا من الجيزة "أنا عايزة أنتخب، بتضايق جدًا لما بشوف الأطفال بيروحوا يحطوا صوابعهم فى الحبر الفسفورى وكأنهم انتخبوا، ليه هو إحنا مالناش صوت علشان صغيرين، طب بالعكس الأطفال أكتر ناس نزلوا فى كل الثورات والوقفات وإحنا أكتر ناس كنا بنشجع السيسى، يعنى إحنا لينا رأى ومن حقنا نقوله".

"إياد هشام" 12 عامًا، طالب بالصف الأول الإعدادى من الإسماعيلية: "نفسى الرئيس يلغى مادة التاريخ من المقررات، أنا أصلاً مش بصدق كل اللى مكتوب فى الكتب، وبكره التاريخ ودايما درجاتى فيه قليلة، ما هو لو كان كل الناس دى أبطال ليه دلوقتى عندنا كل المشاكل دى".

"محمد عبدالعزيز عثمان" 12 عامًا طالب بالصف الأول الإعدادى: "عاوز السيسى يطلعنى فوق البرج وأشوف مصر من بعيد من فوق، وبعدين ناخد مركب فى النيل ونلف لفة كبيرة طول اليوم، علشان بابا ودانى مرة ومش راضى يودينى هناك مرة تانية".

"جواد حلمى" 7 أعوام، طالب بالصف الأول الابتدائى: "عاوز الرئيس ياخد باله من الشباب، ويوفر لنا شقق لما نكبر علشان نتجوز فيها".

"ملك مصطفى" 5 سنوات من حلوان: "عايزة الرئيس يمشى كل الإخوان من حلوان عشان بيخوفونا، وهما كل أسبوع بيعملوا مظاهرات تحت البيت ويضربونا ويموتوا الناس، وما بنعرفش ننزل الشارع ولا بنروح الحضانة".

إياد محمد عادل فى الصف الثانى الابتدائى (8 سنوات) من 6 أكتوبر: "نفسى إن الرئيس يحافظ على البلد وما يخليش حد يدمرها ولا يسيب أى حد يموت الناس".

"عبد العزيز محمد عبد العزيز زايد" الطالب بالصف السادس الابتدائى فى مدرسة الملك فهد النموذجية، ويعيش فى المعادى: "نفسى الرئيس ما يخليش فى قنابل تانى فى مدرستى لأننا اترعبنا لما كان فى قنبلة فى أتوبيس نقل عام قدام المدرسة وانفجر، وكان فى قنابل تانية مزروعة على باب المدرسة فى شجرة، ونفسى الرئيس يخلى الدنيا أمان عشان مامتى ما تقوليش ما تنزلش عشان ممكن حد يثبتك أو يخطفك".