راضى على الطهطاوى يكتب: الحب الصادق

الله محبة
والحب للمؤمن شعار
الحب لمّا تشوفه عينا
تصبح الضلمه نهار
الحب لو غاب من قلوبنا
قول على الدنيا الدمار
لو قلب ضاع الحب منه
راح يعيش الجنه نار
لمّا بينا الحب يطرح
راح يحلـِّى أى مطرح
يملا كل الكون ثمار
دا الحب شمس ونور عمار
سر الحياه جوا القلوب
يضحى ما يعرف هروب
ألف ورده
للى أخلص فى الموده
حـَب الوطن
صان التراب
قلوب ما بتحبش
تصبح خراب
لونها أسود كالغراب
لمـَّا تكره انت أخوك
تلقى كل الدنيا شوك
تلقى كل الناس سبوك
تلقى طعم الدنيا مر
تبقى غاب
تبقى للعطشان سراب
ألف ورده
للى أخلص فى الموده
واللى عشعش جنب طيره
مامنعشى حد خيره
حـَب غيره وأهل داره
ضحى لزميله ماخنشى جاره
ألف وردة للقلوب
اللى لو عشقت تدوب
اللى بتحب ببصحيح
ضحكتها بلسم للجريح
قلوب بتعشق من صميمها
صامدة ما اهتزت بـريح
للوداد دايما ً تصون
طاهره ما تعرف تخون
أوتضر
جوّا منها الخير يسر
لمّـَا يبقى بينا بُغض
ولا تار
لمـَّا نكره بعض
عار
الله محبة
والحب للمؤمن شعار