م.عبد الرحمن عمر يكتب: صوتك بطاقة عبورنا للأفضل

يا ترى من هو رئيس مصر القادم؟ السيسى ولا صباحى؟!
سؤال يشغل بال الكثير منّا، لكن من المحتمل أنه يغيب عن تفكيرنا أننا -نحن- الإجابة.. نعم، فالإجابة تتلخص فينا حيث "أننا" البطاقة الرابحة فى هذه المرحلة التى تمر بها مصرنا فى هذه الأيام. عشان كدا صوتك "مش" هيفرّق -بالعكس- صوتك هو اللى هيجمع.. هيجمعنا كلنا بعد ما فرقتنا المصالح والظروف والخناقات والمشاحنات والهتافات والتحيُّزات والانتماءات والأيدولوجيات و...

صوتك هو بطاقة عبورنا كلنا للأفضل، بطاقة عبور مصر للقادم اللى بإذن الله يحمل التقدم لبلدنا.. انزل وقول رأيك.. إنت حر: إدى صوتك للسيسى، أو لصباحى، أو حتى ابطل صوتك لو المرشح بتاعك مش موجود فى بطاقة التصويت.. المهم تبقى شاركت برأيك لأن صوتك دا أمانة.. فى ناس كتير أنت تعرفهم كويس وافاهم الأجل وتوفوا -إلى رحمة الله- دون أن يسعفهم الوقت ليصلوا ليومى التصويت زى ما أنت وصلت، فاستغل الفرصة ولا تضيع وقتك فى نقاشات أو اختلافات أو مشاحنات.. انزل وقول رأيك بكل صراحة وحرية فى بطاقتك للتصويت.

فكر وخليك إيجابى وشارك فى اللى بيحصل حواليك وأنك تكون نفسك برأيك وصراحتك دون أن تحجر على الآخَر أنه يعبر عن رأيه أيضًا بكل صراحة ووضوح، فالانتخابات هى وسيلة عبقرية للاحتكام لرأى الأغلبية اللى بالمناسبة مش شرط يكون صح 100% لكنه هو رأى الأغلبية واللى هيدافعوا عنه ويسعوا لنجاحه لأنهم اختاروه، وعلينا أننا نتقبل رأى الصندوق وكل منا يختار دوره فى المرحلة المقبلة بإذن الله، وأرجو أننا كلنا نختار دورنا بما يصب فى مصلحة بلدنا.

شوف مصلحة بلدك فين من وجهة نظرك واخدم بلدك فى المكان المناسب واللى هتجيد فيه، صدقنى لو عملنا كدا -بس- هتكون بلدنا أحسن، ومهما كنت مشغول أو كنتى مشغولة مفيش حاجة فى الدنيا تشغلك عن إنك تدى صوتك لـ"مصر" عشان تقدر تكمل بينا ولينا.

ميعادنا إن شاء الله يوم 26 و27 مايو أشوفكم على خير.. مستنيكوا، وأختم همستى لك هذه المرة: بكلمات التلقائى صاحب الـ10 آلاف موّال "محمد طه" أنتى الأصيلة يا مصر …. وكلنا عارفين
أنتى الأصيلة يا مصر …. وكلنا شاهدين
بحق محمد نبينا وعيسى نبى الله
النور ويانا والعمال العاملين المخلصين والأحباب ويانا
دى مصر أم العَلم
مصر جميلة وأصيلة فيها ولدى وفيها بلدي
أنا ابن المنوفية وصعيدى يا سيدي
وسيدى كان فلاح وأصلى فلاح وحى على الفلاح
وأبو زرع طيب يقول حى لى الإصلاح
وعمال عاملين عملو الخزف والصينى
مواصينى أبويا بكل فَـلاح
وقالى: مصر جميلة, مصر جميلة, خليك فاكر, مصر جميلة