مينا أمين يكتب: حياتى

كانت عبارة عن قصة تافهة حالة بايخة من السذاجة
حاجة كدة ملهاش ملامح مهما تسأل مفيش إجابة
زى حوض السمك بس من غير المية
ويوم ماتلاقى المية أكيد مش هتلاقى السمك
ماتستغربش ماتستعجبش
دى قصتى وسبنى أنا اللى هأحكيها
مهما كانت تافهة بايخة هى دى الحقيقة فيها
انت عايز ايه ؟
عايز تكون أحن عليا من نفسى
ياريت طب ده أنا حتى نفسى
بس خير
فجأه صوت جه فى ودانى قالى قوم وأعمل حاجة
أى حاجة تقدر عليها إن شاء الله كلمة من غير سذاجة
قوم ازرع الشجر
قوم ازرع الأمل
اعمل بس أى حاجة بتمن أو من غير تمن

وفى لحظة السكوت وفى لحظة السكوت
حاجة جوايا اتحركت
قالتلى اسمع النصيحة
اعمل أى حاجة نافعة جايز تلاقى نفسك فيها
جايز تلاقى حاجة حلوة تغير حياتك بمعانيها
وفعلا عملت كده وفعلا عملت كده
ولما عملت كده
شوفت بعينى حياة حلوة كنت محروم من معانيها
شوفت بعينى أمل فى حياة مكنتش تلاقى أمل فيها
والقصة اللى جاى أقولهالك
وعايز تعرفها وتذاكرها وكمان تتفوق فيها
ان ربنا لو عندك مشكلة أكيد ربنا سايبلك الحل فيها.