فيسبوك
واتساب
خَليتينى انتى ... بنفسِك
عندى حيرة و عندى شك
تِبقِى بس تلومى نفسِك
لمّا فيكى احتار و اشُك
فى البداية أنا سألتِك
لو واحد تانى فى قلبِك
كان ف نفس اللحظة ردك
إنى هبقى كل حُبِك
بعد كده ظهرت حاجات
كنت انا بشوفها غريبة
كان عليكى تصرفات
كُلها كانت مُريبة
لو سألتِك كنتى فين
كنتى بتدارى عليّا
كَت إجابتك رُحتى حتة
و انتى رُحتى حتة تانية
كان يجيلك الاتصال
كنتى ما ترديش عليه
أو تِغَطى ع الكلام
و ابقى مش عارف فى إيه
إنتى مش كُلّك معايا؟
كل قلبك دا عشانى ؟
ولّا حُبى مش كفاية؟
قلتى لازم حب تانى ؟
إنتى لو قدامى واضحة
مستحيل انا اشك فيكى
لكن انتى ف كل لحظة
بلمح الغدر ف عينيكى
صعب أوى حكايتنا تِكمَل
و الخداع بقى بينَّا باين
الحقيقة ..انا مهما يحصل
مستحيل ليكى هآمن .
أرشيفية
