ايه احساسك ؟!
وانت ف غربه
بعيد عن ناسك
زى الطفل
خدوه من أمه
زى التايه
جوا الزحمه
نفسه ف حضن أمان
يضمه
اللى يغيب
عن وطن الدار
يلقى الشهد ف بقه مرار
كل هموم الدنيا تغمه
ايه احساسك ؟!
وانت ف غربه
بعيد عن ناسك
يااااااه ع الحرقه
ف وجع الروح
لمّا بتبعد عن أحبابها
يااااااااااه ع الفرقه
ولا مرارها
ياناس وعذابها
فين الشله وفين اللمه؟!
فين الخاله وفين العمه؟!
لما تلاقى نفسك سارح
تلقى الورد ف إيدك جارح
حتى الانفاس خنقه وذمه
ايه احساسك
لمّا حنين الشوق
يندهلك
ولاّ انين الذكرى
لأهلك
لما بتسهر وانت وحيد
عمرك كله قضيته بعيد
أغلى حبايبك مات ولا شفته
جبت المال من وجعك عفته
ايه احساسك؟ّ
عايز تعرف
ايه احساسى
وانا محروم
من أهلى وناسى
ياااااااااااااه
مآسى
باشرب
مر الحزن ف كاسى
عايز تعرف
ايه احساسى
بص ف ورده
تكون دبلانه
بص ف ضحكة
وش يتيم
بص ف أرض شراقى جفاف
ولا ً عيون ف الليل بتخاف
عايز تعرف ايه احساسى
وانا ف الغربة
وانا محروم م الأهل وقــُربه
زى الواحد ناسه سابوه
جوا القبر لوحده ف تربة
عايز تعرف معنى الكربة
اسأل واحد
سافر جرّب
اسأل واحد تاه عن أهله
يوم واتغرّب
اسال واحد كان
عطشان جوّا الصحرا
شاف المية
بعيد تتسرّب
ده احساسى
وانا ف الغربة
بعيد عن ناسى
باشرب
مر الحزن ف كاسى
باشرب
مر الحزن ف كاسى
صورة ارشيفية
مشاركة
اضف تعليقاً واقرأ تعليقات القراء
مشاركة
لا توجد تعليقات على الخبر
تم أضافة تعليقك سوف يظهر بعد المراجعة