من خلف طيات الكفن...
بصيت...لقيت.
مجموعه نطت تخطف الأضواء.
ريحة العفن...لم تنته...
هياها كمكمة العفن.
لون السواد...ريحة النفاق.
يطلع البيه اللى ثائر...
يدعى حب الوطن.
يذرف الدمعات حزينا...
ع اللى سال منهم دماء.
انشكح وامسح دموعى...
وافتكر أيام صمودى...
وافتكر رفضى لرجوعى...
وسط دعوات لانتهاء.
بسبرجع تانى والمح بين عنيهم...
كدبهم...بلمح رياء...
صوتهم اللى مصدعنا بأنه صاحى...
وإنه ياما عشانا ماتو...
والعجيب إن اللى مات ده...لسه صاحى!!!
أغلى شىء عنده...حياته.
يا وطن.
هما ناس عارفين يموتو لجلك أنت...
فى الخيال.
هما ناس...عملو الرجال.
بعد ما ماتو الرجال.
واحنا ينسونا ببلاش.
احنا متنا...
والسياسى الحق...عاش.
السياسى...
كلمة فضفاضة بتحمل
ألف معنى وألف لون.
بس هو الكدب هو...
كدبهم يملأ العيون.
اللسان...
أطول لسان...
أكتر كلام...
شغلانتهم...من زمان.
والمستمع...مجنون.
والمقتنع...مجنون.
غمضونا يا وطن.
وقعونا ف بعضنا.
يعنى بعد الموت عشانك...
موتونا لرأينا.
فهمونا إن احنا بس الفاهمين.
خوفونا من المحبة...
فهمونا إن احنا ناس مش فهمانين...
وإن هما وبس...(نخبة)
بس ساعة الموت يا حلو...
متلمحوش.
ديله ف سنانه الفكيك ومتلحقوش
احنا بس الميتين
احنا لو عادت حياتنا نترك اللذات ونرجع...
نشتهى ريحة النعوش.
احنا حبينا التراب...
اللى هما محبهوش.
يا وطن...
أنت عارف قبرى لساك...
عشمى إنك منستوش.
لما تزهق كدبهم...
عود إليا وافتكرنى بدون دموع.
مد إيدك...بين ترابك...
تلقى جسمى المرمى لساه بين ضلوع.
تلقى وشى المبتسم...
مستقبلك من غير نفاق من غير رتوش.
تلقى طين أرضك عليه...
طلبى بس...متمسحوش.
سيبلى حاجه تقول بأنى...
مت ليك...
بس...هما مابيموتوش...
ليك يا وطن....ما بيموتوش.
صورة أرشيفية
مشاركة
اضف تعليقاً واقرأ تعليقات القراء
مشاركة
