يعنى إيه نجاح.. يعنى أهداف محددة لازم نوصل لها، يعنى تقييم واقعى لكل الموارد المتاحة مادية وبشرية ومعلوماتية ومالية. يعنى تحليل للوضع الراهن وكل الظروف المحيطة والتحديات والعراقيل والعوامل المساندة. وبعدها وضع خطط تفصيلية خطوة خطوة لكل فرد فى فريق العمل. وشرح تفصيلى للخطة والأهداف. وتأكيد على الأسباب والنتائج والفوائد لكل طرف مشارك.
ولما تكون الخطة والنظام والسرعة والمعايير كلها جديدة عالفريق، يبقى لازم متابعة اكتر من دقيقة لكل خطوة وكل واحد. عشان العادى بتاعهم إنهم تلقائيا هيحاولوا يعملوها زى ما اتعودوا دايما. ولما يكون فى أطراف داخلة فى التنفيذ ومش تحت سلطتك، يبقى تتوقع مزيد من العقبات وتعمل حسابك انك تدخل تساند ناسك بكل ما عندك.
وبعد كل ده هتلاقى برضه العملية ممكن تتعطل شوية، بسبب عناصر خارجة عن الإرادة أو لعيبة فى فرقتك يكون الموضوع كبير عليهم أو ببساطة للخوف من السرعة والتغيير.
فى ناس لما تلاقى العملية منظمة والإعداد هايل تخاف اكتر وتقول لا بلاش نستنى ونعيد ونزيد. وساعتها لازم تدخل جامد وتعمل أفلام وساعات تهدى اللعب لما تلاقى اللى غلطان خايف ومرعوب. هتمشى. هتطلع القماش إن شاء الله. بالتخطيط والتواصل والإصرار والمتابعة والمساندة والقيادة. لو كل واحد عملها فى حتته بلدنا تتغير للأفضل.
صورة أرشيفية
مشاركة
اضف تعليقاً واقرأ تعليقات القراء
مشاركة
