محمد عمر يكتب: مهما بيطوِّل غيابك

بتغيب كتير عليّا
لكن عارفاك هترجع
لو مش قُدّام عينيّا
قلبى لقلبك بيسمع

على أشواقى ما بقدر
لمّا تطوِّل فى غيبتك
بس ف نفسى بَصَبَّر
و بقول دا غصب عنّك

حاضر حتى ف غيابك
كل حاجة ليك بتشهد
صورتك، قلمك ، كتابك
فيها ريحتك مهما تبعد

كل رُكن و فيه حكاية
تحكى عن أشواق و حب
وقت ما انت تكون معايا
و احنا قلبين صبحوا قلب

لمّا يجينى اتصالك
بتلِّف الدنيا بيّا
بلقى ف صوتك وِصالِك
و بترجع روحى ليّا

يوحشنى ساعات لُقاك
و آخد صورتك فى حضنى
و بروحى بدوب معاك
و كإنك فجأة جيتنى

يوم ما ترجع يبقى عيد
فيه بتضحك دُنيتى
بلقى كل الكون سعيد
بيشاركنى فرحتى

عمره لحظة ما قَّل حبى
للنهاية... انا مُخلِصالَك
دايما انت جوا قلبى
مهما بيطوِّل غيابك .