صحيح عارفه
مانيش أجمل
بنات الكون ولا الأروع
ولكن قلبى ليك مجداف
ف دنيا خرسه ما بتسمع
وأنا الخايفة وأنا الشايفه
وأنا العارفة بإن الحضن
منى حياة
ومين غيرى إليه تِرّجع
حقيقى الحسن
بيداعب عيون وقلوب
وناس تعشق
وناس تِبّعد
وناس بتدوب
ولكن شَكلى شىء تانى
وهمسه دافيه سَكنانى
ما تتغرش ف زيف بودرة
وما تشوفشى شروقى غروب
ساعات العين قوام تعشق
ويسهر قلب كام ليلة
وعشق الجسم مش مبدأ
ولكن قلبى ضُليله
يحن عليك وهيطبطب
ولو شافك حزين يصّعب
عليه حالك وفيك يغّرق
يتوه وياك بدون حيلة
ما تستسلمشى لعيونها
وتعشقها بدون تفكير
دا لو قَرّبت يوم مِنّها
هَتسّحر قلبك انت كتير
وهتحس بحنين ليها
وأشواقك تعيش بيها
وتعشق كل شىء فيها
ويوم ما تخونك الصورة
هتلقى الفرق بينا كبير
صورة أرشيفية
مشاركة
اضف تعليقاً واقرأ تعليقات القراء
مشاركة
