أحمد عبد الغنى يكتب: اعمل الصح..!!

لا أدرى لماذا يعترض المصريون دائما عندما تطلب منهم حكوماتهم مساعداتها على تجاوز المحن والأزمات؟؟ ولماذا يطلبون العون دائما من الحكومة ويطالبونها دائما بحل المشاكل والأزمات ولايريدون أن يتعاونوا معها فى أى شىء؟؟ ولماذا لا يثق المواطن المصرى فى المسئولين وينظرون إليهم دائما بنظرة شك ويشككون فى نوايا الحكومة دائما، ويفترضون فيها سوء النية؟؟
يمكن دا علشان زمان أحد الوزراء قالهم شدوا الحزام ولازم نتقشف علشان نعدى الأزمة اللى أحنا فيها والشعب الغلبان وقتها صدقوا وقالوا أمين وشدوا الحزام وجاعوا وصبروا ومفتحوش بقهم ورشدوا الاستهلاك والأنفاق.. لكن بعد كدا اكتشفوا أن الحكومة الميمونة معملتش زيهم لا دى كمان كانت بتنفق ببذخ والسادة المسئولين اللى حرموا الشعب من الأكل.. كانوا بيأكلوا أحلى أكل ويلبسوا أحلى لبس وبيقيموا الأفراح والليالى الملاح فى القصور والفيلات والفنادق وكمان كانوا بيهادوا بعض بأراضى الدولة وبفيلات مارينا والساحل الشمالى والعلاج على نفقة الدولة دا غير التعيينات والوسايط والمحسوبيات.. فالدولة اللى قالت لهم شدوا الحزام.. شدت عليهم فعلا الحزام.. !!
وجه اليوم اللى خرج فيه أحد الوزراء وأعاد الفكرة تانى وقال للشعب إن حل مشكلة الكهربا يكمن فى أن الأسرة المصرية تخفف لبسها وتلبس ملابس قطنية ويقعدوا مع بعض فى أوضة واحدة.. وكأنه ما بيحرمش وفاكر أن حد دلوقتى هايصدقه بعد الكذبة القديمة بتاعة شدوا الحزام.. وطبعا ولا حد عبره لأن اللى اتلسع من الحزام بينفخ فى القطن..!!
والآن يأتى الكلام عن ترشيد الأنفاق مرة أخرى وترشيد الاستهلاك واستعمال اللمبات الموفرة لتوفير الكهرباء ونقسم الرغيف على أربعة لحل مشكلة الخبز.. وبرضو محدش عايز يسمع وعمالين نتريق وبس.. !!
طب ليه يا مصريين..؟؟، ما تيجوا نعمل الصح بجد ونبدأ بأنفسنا بغض النظر مين قال ومين عمل والكلام دا من المرشح الفلانى ولا من المرشح العلانى.. .!!
نبدأ بأنفسنا ونشتغل بجد ونرضى ربنا وضميرنا فى أشغالنا وكل واحد يخليه فى نفسه ويخلى تقدم مصر هدف بالنسبة له وأن تحقيق التقدم دا بأيدينا أحنا ومش هيكون بيد حد تانى..
نبدأ بأنفسنا ونرشد استهلاكنا فى المياة ونقلل من فاقد المياه واستعمالها فى الفاضى والمليان، لأن الأزمة الحالية والقادمة والمستقبلية هى أزمة مياه والحرب القادمة فى المنطقة من أجل المياه.

نبدأ بأنفسنا ونرشد استهلاكنا من الكهربا فعلا وميبقاش استعمالنا ليها على الفاضى والمليان.. ومش لازم ننور البيت كله طالما مش قاعدين فيه أو ننور الحجرة اللى قاعدين فيها ونطفى باقى الأنوار.. وياريت يا حكومة أنت كمان تساعدينا وتطفى أنوار المصالح الحكومية بعد انتهاء الأعمال لأنه مش معقول يفضل النور منور فى المصلحة الحكومية بعد انصراف الموظفين من الساعة 3 أو 4 عصرا لحد تانى يوم ولو تطلب الأمر أن موظف الأمن يكون مسئول عن كدا، ويتجازى لو قصر فى كدا..!!

وإيه المانع كمان لو قسمنا العيش على أربعة ومنرميش حاجة فى الزبالة ونجمع الباقى منا ونتبرع بيه لبنك الطعام لأن غيرنا محتاج الربع رغيف دا اللى أنت هترميه.

لازم بجد كلنا نتعاون مع بعض علشان نعدى بمصر لبر الأمان.. كلنا مصريين وكلنا مسئولين وكلنا لازم نعمل الصح..!!