حجاج فراج يكتب: حضن الوطن

ليه يا وطن ليه صار
أرخص ما فيك الدم
ليه اختفت البسمة ليه
وحل الغم
ليه تهجرك الفرحة ليه
وتعيش فى هم
ده أنت دايما يا وطن
كنت لينا حضن أم
لو بنقسى يوم عليك
بتقابلنا بالحنان
لو بعدنا يوم عليك
معنى ده نهاية الزمان
فيك بنشعر بالسعادة
فيك بنشعر بالأمان
ليه تقابلنا بالإشادة
وإحنا بنقابلك بذم
يا وطن حقك علينا
إحنا مش عارفين نصونك
بالكلام بس وفينا
وكتبنا أشعار فى عيونك
بالأغانى إحنا ابتدينا
والحزن ساكن فى جفونك
كل يوم تنده علينا
وكلنا أصبح أصم
يا وطن عايشين فى خيرك
من الميلاد للمنتهى
عمرنا ما نحب غيرك
يا للى الحياة فيك سرها
يا للى مكتوب فوق جبينك
الحضارة أنا أصلها
ليه بتمنحنا المحبة
نمنحك إحنا الألم
يا أهلنا صالحوا الوطن
الوطن هو الحياة
وتعالوا بينا كلنا
للوطن نكسب رضاه
وأنشروا بينا المحبة
تلقوا الوطن حضنه يضم