المصريون يحتفلون بهدف "صلاح" الثانى بالدورى الإنجليزى على طريقتهم: أسيادنا اتصلوا عليا وقلت لهم ده الفنان محمد صلاح شيبة نجم تشيلسى..وآخر: فرحانين بإلغاء جول إيفانوفيتش عشان مش صلاح اللى جابه

احتفل نشطاء مواقع التواصل الاجتماعى "فيسبوك وتويتر" بالهدف الثانى للجولدن بوى المصرى "محمد صلاح" بقميص العملاق الأوروبى "تشيلسى الإنجليزى" وبالأداء الرائع الذى قدمه خلال المباراة التى شارك فيها أمس السبت أمام فريق ستوك سيتى والذى وانتهى لصالح البلوز بثلاثية نظيفة ضمن الجولة الـ 33 من منافسات الدورى الإنجليزى.

ودشن النشطاء هاشتاج يحمل عنوان "العب يا صلاح" للاحتفال بهدف صلاح الثانى فى الدورى الإنجليزى، كما طالبوه بالتركيز فى اللعب والاستمرار بالأداء الجيد حتى يقنع البرتغالى جوزيه مورينيو للاعتماد عليه فى التشكيلة الأساسية للبلوز.

واعتمد جوزيه مورينيو المدير الفنى للبلوز على اللاعب المصرى "محمد صلاح" فى التشكيلة الأساسية لمباراة أمس ودفع به من بداية المباراة ولعب صلاح اللقاء كاملاً، واستطاع بأدائه الرائع وضع بصمة جيدة فى المباراة بإحراز هدف وصنع هدفين خلال مشاركته، كما تم اختياره للفوز بلقب رجل المباراة.

وتوقع ناشطون أن المدير الفنى للعملاق الأوروبى سيعتمد على محمد صلاح فى التشكيل الأساسى بعد أدائه الرائع فى مباراة أمس، قائلين "صلاح هيلعب أساسى فى كل المباريات"، "بعد الأداء الرائع لأبو صلاح مورينيو يبقا بيهزر لو قعد صلاح على الدكة"، و"صلاح فرض نفسه خلاص على التشكيلة الأساسية بلعبه المبهر إمبارح".

فيما أعرب آخرون عن حزنهم لعدم قدرتهم لمشاهدة المباراة بسبب انقطاع الكهرباء، قائلين: "يوم متلعب أساسى منشفش الدورى الإنجليزى أكيد أنت فقرى يا أبو صلاح"، "يعنى يا ربى لما صلاح يلعب أساسى ويجيب جون ويصنع 2 يكون النور قاطع ومنشفش الماتش"، "منه لله اللى قطع النور ومخلاناش نتفرج على أبو صلاح وهو بيبدع".

وطالب النشطاء صلاح باللعب وتقديم أداء طيب مع فريقه، قائلين "العب يا صلاح وسيبك من كل حاجه تلهيك عن الكوره"، و"العب يا صلاح ربنا يوفقك واوعى تقلد تجربة المصريين الفشلة فى الدورى الإنجليزى"، "العب يا صلاح وإن شاء الله أشوفك أحسن لاعب فى أوروبا"، "المصرى معروف بجبروته وبقوته وبأهدافه مع تشيلسى".

وقام بعض النشطاء بتقمص دور مقدم المباراة وقاموا بوصف الهدف الثانى بالقميص الأزرق، قائلين "الحمد لله رب العالمين واثق من نفسه وان تاتش اسكرين وراح شاط على طول لو هنا كانوا قالولوا وقف وبص وحدد الزاوية وشوط"، "شورلى مر من الجنب اليمين ولعبها عرضية قوية بشماله، قابلها صلاح بشوطة حلوة فى الجول".

كما تبادل النشطاء بعض العبارات الساخرة احتفالا بهدف صلاح الثانى بقميص تشيلسى"، قائلين: "ولعب بالصلاة على النبى صلاح وجاب جول وممشى الفرقة كلها اللهم لا حسد مورينيو لو شاف الهاشتاج هيشد فى شعره"، "90 % من المصريين فرحانين بإلغاء جول إيفانوفيتش عشان مش صلاح اللى جابه"، و"المصريين فقدوا الأمل فى المنتخب والفرق المصرية فقرروا كلهم يشجعوا ﻻعب واحد فى فرقة مش مصرية"، "أسيادنا اتصلوا عليا قولتلهم ده الفنان محمد صلاح شيبة نجم تشيلسى".

كما وجه أحد النشطاء رسالة تهديد إلى "نيمانيا ماتيتش" لإجباره على التعاون مع صلاح فى الملعب، قائلا "هتفضل كويس مع صلاح وبتباصيله وبتـعـمـله أجوال هنحـبك وهتـبقى أحـسـن دفنـدر فى العالم، هتتـغر بقى ومـش هتـباصى للواد وهتـيـجى عـليـه هنـعمـل حـمـلة "طـلع مـا تيتش‬" ومش هنخليك تلمس الملعب تانى".


وتابع النشطاء سخريتهم قائلين: "ربنا يقويك يا صلاح وتدخل منتخب مصر كأس العالم وتنسينا جون مجدى مجدى عبد الغنى فى كأس العالم"، و"لما تشوف صلاح لأساسى وهازرد على الدكة بيتفرج ايده على خده يو فيل لايك ايوه بقى سيبونا نشوف مستقبلنا"، ""إذا سـجل صـلاح فى المباراة الـقادمـة فسيعتبروه المصريين أول لاعب فى التـاريخ يـسـجـل هـاتـريك مقسـم علـى 3 مباريات".

وطالبت إحدى الناشطات صلاح بأن يثق فى نفسه وفى موهبته، قائله "صلاح مشكلته إنه حاسس أنه أقل منهم .. برغم إنه أحسن من معظمهم .. لازم يثق فى نفسه وفى موهبته .. يرجع صلاح بتاع بازل".