فيسبوك
واتساب
كفاية يا مصر متولديش
اللى جاى ازاى هيعيش
شايفه ولادك يا طيبا
دلعتى انتى ومربتيش
يا أم الدنيا الله يعينك
ولادك كتير وتعبينك
ونيلك من دموع عينك
غيران بيقولك متبكيش
عدوك خايف يقرب
وابنك جوا بيخرب
واخوه هرب متغرب
حالف إنه ما يجيش
اللى صبح مفجوع
ومهما ياكل يجوع
وعلى القرش مسروع
وخيرك ليه مبينتهيش
اللى بيربى كرش
واللى بالف وش
كدب نصب وغش
كفايه يامصر متاكليش
اللى حرف الطريق
واللى اشعل حريق
وجعل عدوك صديق
ناس تخاف ولا تختشيش
جهل وعقولنا خراب
أمراض والكل اتصاب
ذل و خطف اغتصاب
كأنك يا مصر معلمتيش
وقت الجد ما صحينا
وقت البرد ما دفينا
وحر الشمس يكوينا
كفايه يا مصر متزعليش
ناويين يقسموكى
عايزين يعجزوكى
فاكرين هيورثوكى
شدى يا مصر وما ترخيش
لساكى شابه وصبيه
صلبه عفيه وقوية
شدى حيلك شويه
كلامى جد متضحكيش
المولى حاميكى
وجيشنا يفديكى
بدمه يرويكى
حالف يموت ومصر تعيش
كفايه يامصر متولديش
اللى جاى إزاى هيعيش
شايفه ولادك يا طيبا
دلعتى إنتى ومربتيش
دلعتى إنتى ومربتيش
علم مصر
