سليمان الزهيرى يكتب: ما بقيتش أخاف

ما بقيتش أخاف إنى أسيبك تغضبى م البيت
وأدفع معاكى الفاتورة عشان صحيح حبيت
كان مين خلافى يا غالية يسد ف الدائنين
وأنا اللى طول عمرى شايل لحد ما اتشليت
ما بقيتش أخاف إنى أقولك والدموع ف العين
سبيلى قلبى ارحمينى من الوجع والدين
الخال بيقتل هنادى فى دعا الكروان
والقلب بابه الحديد قسم النهار نصين
إدينى قبل ما تقتلينى الاسم والعنوان
دع ما لقيصر لقيصر وما للأوطان للأوطان
وبلاش تخلى ما بنا فيه من بحور من دم
وما تنصبيش جوا عينى من الدموع قضبان
يحطوا فوقى صخور زى الأُصع ع الضهر
ما بقولش غير الحقيقة ......
وهو فيه غير مصر
ما تخلنيشى أقولك لو حدوس ع الشوك
ولو اندبحت ابقى لمى العضم شبكة ومهر
وسلمينى لأقرب حضن جواكى
وابقى افتحى دراعاتك الواسعين شواهد قبر
ما بقيتش أخاف من كُرهى للتواريخ
كّسرت كل السيوف المتربة ع الحيط
وجلدت كل الأوليا قدامى
قلتلهم انتوا السبب فى اللى حصل دلوقت
انتوا ضياع الحقيقة ف ألف شاهد زور
خليتوا ليلكم يطول وطفيتوا كُبس النور
بقيتوا فرسان تعّجز أى راكب خيل
وقفلتوا ورا منكم ترباس ورا ترباس
انتوا السبب ف الدهس ع اللى انداس
وفى العجز لما يخش قلب الناس
ما بقيتش أخاف م الحقيقة ومن جمل ماركس
- الدين أفيون الشعوب -
ومش مطالب أحبك تانى بالتقسيط
يا تسلمينى مشاعرك يا نفضها سيرة
ما بقاش ما بينا يا ستى لا صحبة ولا جيرة
إذا كنتى قابله إن قلبك يتخطف منك
ما بقتش قابل أحبك وانت من غير قلب
الدبلة وسعت عليكى ورخصت الغنوة
والحب من طرف واحد ماهوش حب
ما بقيتش أخاف إنى أقولك لأه لو بالجهر
الراهب اللى قصادك قلبه ماهوش وقف
إذا كنتى عايزانى أموت علشان أجيب المهر
فأنا ع الحميد المجيد من غير حيطان ولا سقف
ما بقيتش أخاف إنى أقولك طظ ف النياشين
وخمس تلاف سنه حضارة وأهلهم جعانين
وف اعتبار المكاشفة بالحقايق نار
والجمع بينى وبينك جمع بين ضدين
ما بقتش أخاف إنى أعدى خطوطك الحمرا
وبالمفيد أسألك عن كل شيء عوره
وأخلى رجل القصيدة تدوس على رقبتك
لو اعتبرتى إنى لازم تخلص الثورة .