فيسبوك
واتساب
قالتلى مين إنتَ!!
قولتلها متولى...
قالتلى م الحِتة..؟
قولتلها من بابل..... ونفسى نتقابل
وأرسم عيونك مزز ماكنتش بتقابل
وأكتب على خدودك ...."تُخص متولى"
ضحكت وضحكتها دقت ولا الساعة
وقالتلى طب قولى
بيتك مكانه فين ؟
قولتلها ع التبة .. لساته بيت ب الطين
ومافيهش غير قاعة
وزلوع بناه الشقى ومافيهشى ولا حبة
أو حتى كيلو طحين
لسانى بجمع حطب وأبنى بيوت غيرى
تستاهلى واد غيرى
إحنا اللى مش فاهمين
إن الدهب للدهب
يتلف جوه حرير مش طرحة بالتولى ..!
قالتلى متولى.. !
........قولتلها متولاش
الحب مش ببلاش
وعنينا وقت الوجع هتشوف غرامها طشاش
وهتلعن الصورة ......
ناولينى قطف العنب وإتوصى بالخايب
قالتلى يامنيل.. عنب البنات طايب
قولتلها مش فارقة
وإديتها تعريفة.. فقالتلى ما تخلى؟
قولتلها مستورة..
ومشيت على مهلى
كان نفسى تندهلى.. وتقولى خليك
أرجوك بلاش تمشى
لكن القدر مكتوب
واللى انتصر مغلوب
عدى معاد العنب
والقطف ف ضلوعى لساته ما دبلشى..
صورة أرشيفية
