أحمد عبد الغنى يكتب: مصر اليوم فى عيد!!

ياللى من البحيرة وياللى من آخر الصعيد .. ياللى من العريش الحرة أو من بورسعيد .. هنوا بعضيكم وغنوا .. دا مصر اليوم فى عيد ..!!
دا مطلع أغنية جميلة للفنانة شادية بمناسبة تحرير سيناء.. سيناء التى تشكل جزءًا مهما ومحوريا وحيويا فى مصر.. لن أتحدث عن أهميتها الجغرافية أو التاريخية أو خلافه.. لكن سأتحدث عن أهميتها الحالية .. سيناء بتضيع ياوديع .. حد هيرد على ويقولى ياعم بلاش تشاؤم وخليك متفائل.

أرد وأقوله أنا متفائل بس نفسى أتفاءل أكتر وأكتر وأشوف سيناء حرة بجد .. نفسى أشوفها أتحررت بالكامل من الفكر الإرهابى ومن التكفيريين اللى فيها.. اللى كل يوم بيشوهوا فيها وبيدمروا فى أرضها.. نفسى أشوف أنفاقها غير الشرعية واتردمت بالكامل .. نفسى أشوفها بتتعمر بجد .. نفسى أشوف الزرع ماليها .. والمياه الحلوة بتجرى فى أراضيها .. نفسى تبقى سيناء هى أهم وأجمل مكان فيكى يامصر .. ومن كل قلبى بدعى لجيشنا العظيم أن ربنا ينصره فى حربه على الإرهاب الموجود فى سيناء ويقدر يقضى عليه .. ونفسى بس يكون كمان فى شفافية وصدق مع الناس ويخرج القادة ويقولولنا وصل لحد فين فى حربنا ضد الإرهاب دا.. نفسى الشعب يعرف مجهود الجيش والشرطة فى حربهم ضد الإرهاب.. نفسى الشعب يعرف إيه اللى بيحصل هناك وهل الموضوع صعب وخطير فعلا ؟ وهل الوضع تحت السيطرة أم لا؟ هل سنقضى فعلا على الإرهاب هناك أم لا؟

أجدادنا وأبائنا حاربوا فى حرب أكتوبر 1973 من أجل تحرير سيناء ومن أجل استعادة كل ذرة رمل فيها.. فيا ريت أحنا بقى منضيعهاش بسهولة بعد المجهود دا.. ياريت نحافظ عليها ونقف دلوقت كلنا ضد الإرهاب فى حرب التحرير الثانية من أجل استعادة سيناء نظيفة خالية من الإرهابيين .. من التكفريين .. من الخونة والملاعيين .. من أجل إعادة سيناء إلى مصر وإلى أهل سيناء الأحرار.. ويارب تبقى أيامنا كلها أعياد فى أعياد ونغنى دايما .. مصر اليوم فى عيد!