بالصور.."تويتر" يشتعل بالسخرية مع اقتراب امتحانات الثانوية العامة.. النشطاء: "إحنا عايشين بس عشان الانتحار حرام".. ويوجهون رسالة لواضع الأسئلة: "هتحط أسئلة منعرفهاش هنبهرك بإجابات متفهمهاش"

تمثل امتحانات الثانوية العامة صداعاً مزمناً داخل البيوت المصرية، حيث تُعتبر الفترة التى تسبق موسم الامتحانات وما يليها، من أصعب الفترات التى يمر بها الطالب المصرى، لا سيما أن هذه المرحلة، تعد نقطة تحول كبيرة لمستقبل أى طالب، لأنها تحدد بشكل كبير الملامح الذى سيتكون منها مستقبله.

ومع اقتراب امتحانات الثانوية العامة دشن نشطاء على موقع التواصل الاجتماعى "تويتر" هاشتاج يحمل اسم "الثانوية العامة"، وكالعادة بدأ النشطاء يرصدون بشكل ساخر تعريفهم للثانوية العامة من وجهة نظرهم ورصد لمجموعة من مواقفهم فى الامتحانات.

ويعرف النشطاء الثانوية العامة قائلين، "هى سنة واحدة من 9 شهور، من غير لعب ولا خروجات من غير ترفيه حرمان من أى حاجة حلوة ضغط عصبى، مصاريف، حالة اكتئاب وخنقة من كل حاجة وقلق وتوتر مستمر، وصعوبة السنة مش فى الحاجات اللى بندرسها صعوبتها أنها أول سنة فى حياتك تشيل فيها مسئولية".

ووجه أحد الطلاب رسالة لواضعى اختبارات الثانوية العامة، قائلاً، "أحب أقول للى هيحط الامتحانات.. هتحط أسئلة منعرفهاش! هأنبهرك بإجابات متفهمهاش.. ماشى".

بينما سخر الطلاب من ارتفاع درجات القبول فى كليات القمة من قبل التنسيق، قائلين: "مثلًا واحد جايب 99% وهو علمى رياضة، يدخل هندسة بـ94% والـ5% الباقيين يديهم لواحد جايب 90%؟ مش دى تعتبر صدقة؟ أكفل طالب ثانوية عامة".

بينما سخر آخر من الأمر نفسه قائلاً، "أنا عايش بس عشان الانتحار حرام، أبويا عايزنى أجيب ٩٩.٩.. فاكر نفسه مخلف ديتول".

وتابع النشطاء، "الامتحانات قـربت خـايـف أسقط يعنى هذاكر؟ لا مش معنى إنى خفت يبقى أجيب ورا المذكرة لا تفنى ولا تستحدث من عدم الثانوية العامة يعنى تخاف تبص فى أى تاريخ عشان متعرفش ناقص أد إيه"، "السنة دى ضيعتها فى حاجتين.. بعد الأيام اللى باقيه.. وبعمل كل يوم جدول للدراسة ومش بمشى عليه فبقطعه وبعمل واحد تانى".

وواصل الطلاب سخريتهم من الثانوية العامة قائلين، "اسمها بيجيب تسلخات لوحده"، "يعنى أنا أفضل أذاكر شهور ويجو فى الآخر يمتحنونى فى 3 ساعات طب ده اسمه كلام"، "فيما عرف آخر الثانوية العامة قائلا.. (حاجة لا دين لها).

بينما سخر طلاب القسم العلمى من مادة الفيزياء قائلين، "لو كانت الفيزياء شخصا لقطعته حتت وحطيته فى أكياس بلاستيك ورميته فى البحر"، وسخر آخر قائلا "أنا كل لما أذاكر فيزياء أحس إنى سكران وألاقى السقف والحيطة بيتحركوا".

وسخر الطلاب الذكور من طالبات الثانوية العامة قائلين، "الهشتاج معظموا بنات وبينى وبينكوا يارجاله مفيش بنت مش بتدح وتشرب المنهج.. بيضحكوا علينا".

وأضاف أحد الطلاب، "أكتر حاجة تحرق دمك لما تخرج من امتحان بتقول يا رب أنجح وجمبك بنت عمالة بتعيط علشان ممكن تنقص 1/2 درجة قبل ما تدخلها: عايز أكون مهندس - بعد ما تدخلها: أنا مش عايز أسقط".