أنا باشكر اللحظة اللى خلتنى ارتكب..
أجمل جريمة ف عمرى حَبتها
وباحترم طبع التهور..
اللى خلانى ابقىَ أهَوَج محترف
ودفعنى اسيب..
ف بلادى حاجة ارجعلها فرحان
ما أنبل الدين اللى وَنّس غيبتى بالدعوات
وانا لسه بابدأ رحلتى
ما أجمل الذنب اللى هوَن محنتى..
وجعل حنينى يفور
ما أروع الإحساس ف غربة..
بالنفور م الارتياح
ومن اجتياح بيجرَف الذكرىَ
ما أبدع اللهفة. .
على ضحكة عارفة منين تمس القلب
وشقاوة ف عيون استوىَ شوقها
وقلوب قلقها عليك. .
ان شَمْ ريحة غَرَقْ. .
تسلفك طوقها
ما أجدع الكتف اللى شالك
من رصيف وجعك
ونسى بلقاك حزنه. .
ولخص المسافات
بين الوطن والتوهة عن حضنه
وقطع مسافة ضحكتين جواك. .
وسكِّنك مخدعه
ما أضيع اللى ف سفره بيعانى الفَلَسْ
من بسمتين مابيعرفوش يخدعوا
ودفا ف نعومة ملس
ما أرحم المقادير بقلب غريب
لو ضاقت الدنيا ف عينيه. ..
بتوهبه عفة فقير ماكسرش عينه الجوع
فيطق عرق العِزة ف وِش الخضوع
ويفتكر بإنه ساب ف بلاده كنز كبير. .
فـ ولد وبنت وبيت
يابخت من بإرادته قبل ما يتزنق. ..
جعل. .
ف ضهره الحيط !
