محمد أحمد دويدار يكتب: حيث ما كنت.. سلام يا عمنا

ياعمنا فينك.. محتاجلك أشكيلك من حبيبتك بهية.. لا عادش طرحه ولا عاد جلابية.. من بعدك يا غالى لبست فيزون وحلت شعرها.. وحُمرِة الخجل زالت خلاص من خدها.. وشها بأه لونه مشمشى وأجدع مافيها مشى.. ولا باقى منها غير لسان قبيح زيها وعيون غطسانه من كتر حزنها واسنان متخلعة بتاكل بعضها وضوافر بتنهش لحمها وصدر ام جف فيه اللبن وقلب عاشق جوه الضلوع اتسجن..

ياترى يا عم نجم بعد الغياب لسة شايف الزمن شاب ولسة شايفها شابة ولا ان كتبت الان كلامك راح ينقلب حبه.. هسيبك دلوقتى يا عمنا ترتاح.. أكيد عندك أياً ما كان مكانك فأفضل كتير من هنا.. على الأقل أنت عرفت مصيرك إما إحنا مش عرفين مين ولا ليه ولا أيه بكره راح يحصلنا.. حيث ما كنت سلام يا عمنا.