فيسبوك
واتساب
قبلِك انتى ما كاتش فارقة
شىء يضيع أو حاجة تبقى
بس لمّا ف يوم عِرِفتِك
كل شىء بقى قيمته أكبر
دا اللى خلاّنى...أقرَّر
إنى من نفسى...أغيَّر
لو فِ حاجة هتبقى صعبة
لَجل خاطرِك لازم أقدر
الصفة الوحشة هسيبها
والصفة الحلوة اكتسبها
من جديد هبدأ حياتى
طفل... قلبهُ جديد صُغيَّر
انسى دلوقتى ابقى إيه
بُكرة... نتحاسِب عليه
الفشل مش طبع فيّا...
بس محتاج حَد يصبُر
هجتهد...هتعب... هكافِح
هتشوفينى شخص ناجِح
هتشوفينى بَستحقِك
وف عينيكى هبقى أكبَر
الظروف لو هتعاندنى
هلقى حُبك بيساعدنى
طول ما هتكونى انتى جنبى
كل حاجة تهون وتِصغَر
مش كلام وخلاص... بأكِّد
خَلّى بكرة عليّا يشهد
وانتى هتقولى... بنفسِك
إنى جد ومش بَهزَّر
بوعدِك إنى هكونلِك
إللى يملا عليكى قلبِك
واللى دايماً يبقى جنبِك
واللى ما ف غيرك يفكَّر.
صورة أرشيفية
