فيسبوك
واتساب
كلنا إخوات
مش نفس الأب ونفس الأم
لكن بنبات على نفس الفرشة ونفس الهم
وبنفس الدم اللى بيجرى ف شرايين الدم
حافظين ملامحنا وأيامنا حفظنهم صم
** *
كلنا إخوات
من عرق الأرض
وطين الفجر
وصهد الشمس
راضعين من نبع حليب الورد
أنفاسك سُنَّه وحضنك فرض
بنصلى باسمك فرض بفرض
ونخاف الليل والويل والعرض
***
كلنا إخوات
من نفس العين المشتاقه لعيون الوِد
وبنفس الإيد اللى بتمسك الفاس وتمِد
ف طريق أخضر
يمكن يطرح أحلام ع القد
على قد م تعلى الضحكاية
على قد م تقدر بيها تهد
كل الكوابيس الهدامة
وأمواج الروح من جزر ومد
***
كلنا إخوات
على نفس رصيف التغريبة
كلنا حاضرين وقت الغيبة
وساعات غايبين من غير أسباب
يا ربيع العمر المتخبِّى فى شَعر الشيبة
وخُصلات الراس
صوت الأنفاس
وولاد الناس أكتر م الناس
والقمره تضّوى ف ليالينا
م الساس للراس
***
كلنا إخوات
أول م نزلنا بغير إرادتنا صرخنا بـواء
جرجس ميخائيل أحمد حنا شيماء وآلاء
بحراوى صعيدى منين ما تكون
كلنا جامعانا الحه والباء
دايماً مع بعض بغير مواعيد
حبنا مش لعبة..
أيوه ولأ
الشاعرة مى منصور
