محمد لطفى يكتب: فاكرين زمان

فاكرين زمان
أما كنا صغيرين
كان فى حاجة اسمها العيبة
كان الصغير
ميقدرش يرفع عينه فى الكبير
كانت بتبقى خيبة
لو حسيت ان صاحبك معندوش ضمير
كنا بعد صلاة العشا
تلاقى الشباب على باب الحارة متجمعين
ولو أختى ولا أختك فى الشارع
تلاقينا حواليهم بنحميهم حتى من العين
بس إيه اللى جرا !!!!
من امتى بقى التحرش مجانى يا مصريين
من امتى بقوا بناتنا فى الشارع متهانيين
راح الخشا وبقت العيبة تاج ع الراس
وبقينا نتسابق مين حيغلس ع الناس
فاكرين زمان اما كنا صغيرين
كنا بنفرح بيوم العيد
نخرج ونلعب
ناكل ونسهر
بس عمرنا ما كنا على الشر ناويين
ويا سواد ليلته
اللى يغلس
على بنت الخال أحمد
ولا عم أمين
حاجات كتير اتغيرت
من يوم ما شبابنا بعدوا عن الدين
وتشوف اللى مكهربلك شعره
واللى ماشى ببوكسر يخزى العين
وقال ايه
دول ولاد القرن الواحد وعشرين !!!!
خد بالك يا ابن عمى يا اللى بتتحرش
أمك واختك ف البيت قاعدين
فكفاية معاندة
مش بقلة الأدب حتبقى الشاب المتين
وعجبى..