فيسبوك
واتساب
طلع لسانك لـ الواقع وقوله خد فشار
إيه يعنى مستقبل وطار....
إيه يعنى كل يوم هزيمة..
وعمرك ما شوفت انتصار
خد فشار
إيه يعنى سنين حياتك تبقى ضايعة
واللى باقى منها فى انهيار
إيه يعنى تلاقى ناس بتلعب جوا ملعب
وأنت قاعد احتياطى فى الانتظار
خد فشار
إيه يعنى تشقى طول حياتك
فى المذاكرة والمراجعة
والمحاسبة لليل نهار ؟
خد فشار
إيه يعنى عشان مالكش واسطة
تبقى حاسس بانكسار
ارفعلى راسك لـ السما
وأضحك وقوله.. خد فشار
خد فشار.. وده قرار
مش أنا اللى يبكى ع الزمن
ومنه يهرب ويبلغ فرار
أنا أصلى ميت يا زمن
من يوم ميلادى عيشتى نار
وباختصار أنا لسه قادر إنى أضحك
وإنى أفرح وإنى ألعب وإنى أحزن
وإنى أسهر أكتب قصايد جد ومش هزار
وإنى أبصلك يا واقع من فوق لتحت وباحتقار
وإنى أقولهالك بعلو صوتى من غير ما خاف
خد فشاااار
صورة أرشيفية
