بِعْت الدنيا عشانك مرة
واتحديت الناس والخلق
قالوا عليكى مش من توبى
قلت الحب هيكسر فرق
كل الناس مولودة لتسعة
كله بيفطر ويقوم يسعى
نغطى الراس ف حمو الشمس
فى عز البرد نحس اللسعة
ليه بتحطوا ما بينا حواجز ؟
ليه بتعلُّوا ما بينا سدود ؟
هوه القلب الأعمى بيعرف
لما النبضة بترعش فيه
لما العين تبعت له رسالة
ويحركها النيض لجوفى
عمره هيسأل عن أحوالى
والمتسطر جوه كفوفى
ولاَّ هيسأل عن أموالى
أو يطَّقسْ عنها ظروفى ؟
طلعة وشك بدر وطل
رمان خدك عقلى اختل
لو شايفينها يا ناس بعيونى
كنتوا عرضتوا على الحل
مالهاش حل
لما تهل
لما ساعات ترفعنى لفوق
ولما تسيبنى ساعات أتذل
لمّا أسعالها ميت مشوار
بين التبة وبين التل
علشان نظرة يدوب تنطل
علشان أكتب ليها جواب
أبعت كلمة ف بحر قصيدة
بعت يا ناس كل الرسمال
ولا عاد باقى حتَّى حديدة
صورة أرشيفية
مشاركة
اضف تعليقاً واقرأ تعليقات القراء
مشاركة
