فيسبوك
واتساب
تحديدًا فـِ الصَف الأول
فـِ الدِكَّة التانية على شِمالها
أنا كُنت بسَمَّع دَرس نصوص
وأتلَخبط وأوصِف فـِ جمالها
أنا كُنت أَحضَّر أوِل واَحِد
عَلَشان بَس أقعُد قُدامها
كُنت بَبَات وأسهَر مَخصوص
وأفَكَر إزاى هَسألها
عن أول حِصة فـِ دَرس حِساب
وطبيعى مخدتش منها جواب
ولأنى مكُنتِش مَعروف
فـِ الفَصل ودايمًا مِتساب
كُنت أقعُد أعَيَّط فـِ الفُسحَة
وكأنى عَجوز
أبّيَض الشَعر فـِ راسة وشاب
أنا عِشت أبُص فـِ خُرم الباب
فاطَبيِعى مكَنلِيش أصحاب
أنا شُفت فـِ إسراء كام معنَى
أجبرنى إنى أحب وأدوب
مع إنى ساعتها أنا كُنت صُغَيَّر
واصغر بكتر مِل مَكتوب
إحساسى بإنى وحيد يومها
خلانى اتمَرد ع الحال
وازاى طِفل فـِ سِنى عَجوز
وإزاى مِش مرتاح البال
وإزاى مش مبسوط ودموعى
قادرة تكسر عرش جبال
إسراء مَكَنِتش مُجرد واحدة
عَجَبِتنى فَـ قررت أحِب
دى كانت لى كَيان
اكبر بكتير من فِكره قَلب بيِعشق قَلب!
وعشان مقدرتش أخليها تشوفنى
قررت يوميها إنى مَحِبِش
وابطَل غُلب
صورة ارشيفية
