يوسف إبراهيم يكتب: وحشنى حضنك الدافى

وحشنى حضنك الدافى.. وحشنى كفك بيطبب على اكتافى
وحشتنى بوسة بترميها على خدى.. وحشنى جبينك المدهون بلون وردى
وحشتينى
وحشتنى كلمة من فمك روح يا بنى تكون عالى
ونجمك فى السما يعلى ونجمك فى السما يلالى
وحشتينى
على كل جدار فى البيت.. حطيت
برواز جميل وفيه صورتك
وطول اليوم ابوس ايدك وانام الليل واحلم بك
تروح الصورة قايلة لى.. قوم يابنى لتتاخر على شغلك
اقوم ابكى واقولها بقلبى وكيانى
وحشتينى
ولما يسالونى الناس ع اللى باعشقها وتعشقنى
اقول اللى فى وسط المى امد ايديه الاقى ايديها تسبقنى
اقول أمى
ولما اروح ازور قبرك واحط ورورد على بابه
ساقاها قلبى بدموعه يوم ما قلبك سابه
واقعد برضو احكيلك على مشاكلى على همومى
ومين غيرك هيسمعنى ومين هينور شمس فى غيومى
وحشتينى