فيسبوك
واتساب
مين فينا يا حبيبى مالوش ماضى؟
مين فينا ما كانش ف يوم بيحِب ؟
حاجة طبيعية وشىء عادى
إن أنا قلبى من قبلَك حَب
بينى وبينه كان فى إعجاب
قُلنا: نقرّب...هيكون أجمل
واتعرّفنا وظهرت أسباب
خلّيتنا نقول مش هنكمل
ما انكرش إنى ف يوم حبّيته
كان هوا غرامى وكان حُبى
لمّا عرفتَك كنت نسيته
ولوحدك كنت أنت ف قلبى
أيوا انا حنّيتله وحبّيته
هوّا أنا مش روح ؟...هوا أنا مش بنت ؟
مش أكتر من حبى ادّيته
عمرى ما فرّطت ... ولا مرة غلطت
كَت قصة عادية وبريئة
ومُجرد قلب ومَال للقلب
وف كل خيال بنت حقيقة:
إنها بتحب أنها تتحَب
يعنى أنا أول واحدة ف قلبك ؟
يعنى قَبلى ولا مرة عِشقت ؟
ماهَويتش زميلتك أو جارتك ؟
ولّا بتظلمنى عشان أنا بنت ؟
مش بَلعب لعبة ولا بمثِّل
ماخدعتكش ولا كدبت عليك
لوكنت سألتنى م الأول
كنت هجاوبك وهرد عليك .
صورة أرشيفية
