فيسبوك
واتساب
وفـْرِحتى لمّا عرفتى
بإنـّى ف بطنك بتخلـَّق
وبقيت جواكى فى حشاكى
انا حتة لحمه ومتعلــَّق
وبامص ف دمك واتغذ ّى
وبارفـَّس فيكى برجلـيّـَه
ولا عمرك قلتى بتأذ ّّى
لا ف رُوحَه منى ولا ف جَـيّه
وضلوعك كانت تتوجَّع
والدوخه ف شهور الحمل
واللقمه ف معده بتترجَّع
وف بطنك باسرح كالنمل
وفضلتى يا أمى تستنى
عايزانى أجيكى وتتهنـِّى
وبتحكى لبابا على شكلى
وبتاكلى ياماما عشان أكلى
مربوط أنا فيكى بالسرَّه
وشهورى التسعه يا ناس مُره
وجاتك فجأه أوان ساعتى
والموت بعنيكى شايفاه
وعذاب أنفاسك والحزق
محشور أنا فيكى كاللزق
وسمعتى الصرخه يا أمى بتاعتى
ونسيتى بإنك جوا الموت
وقلتى ضناى
دا أنا أول حاجة
ف الدنيا باشوفها
عيونك
بالضحكه مليانة حنان
رغم الدنيا الواسعه الهـِو
من لمسك حاسيتها أمان
يا حلاوة الفرحه باحساسك
طلعتلى سنان
وانا لسه صغيّر ف اللفة
تاخدينى ف حضنك بدَّفة
وتدلّى فيّا وتشيلى
وبصوت حنيّـَه تغنيلى
وتقيسى بالشبر وكفة
وتقولى امتى يا نور عينى؟!
أرقص يوم فرحك ف الزفة
وحابيت تا تا وباخطـِّى
وبحضن حنانك متغطـِّى
أنا كنت يا دوبك أشاورلك
ولا حد فاهمنى كان غيرك
يالهفة قلبك على وجعى
والقلق اللى معشعش فيكى
وتقضّى ليالى سهرانه
والنوم يجافيكى
ياما كنت اتشعبط ع اللعبه
وحتما ً لازم تجيبيها
وياما كنت اتشاقى وأضايقك
وغلاستى كنتى تحبيها
وبقيت أنا راجل وكبرت
ولا قادر أوَفـِّيـلك خيرك
على حسّك قاعد بتدلـَّع
وكأنى أنا نونو صغيّر
لو مرّه تأخر تتشغلى
وحريقه ف قلبك بتولّع
والعقل بيفضل متحيّر
لو شفتى عيونى سرحانه
بتقولى أنا فاهمه ملامحك
وساعات ف عيدك بنساكى
وتقولى قلبى أنا مسامحك
مين غيرك أنتى عليّا حنيَّن
ياما بنقسى وقلبك ليّن
وياما جرحت أنا ليكى مشاعرك
وغلطه وغلطه تعديها
ولا قلبك عمره بيبيِّن
دا حنانك نبضه فى وريدى
والوردة الحلوة وغصونها
يا أغلى نعمة بين إيدى
وفقنى يا ربى أنا صونها
والعمرسرَقـْنا
والبعد فرَقـْنا
من غيرك أنا قلب جريح
من بعدك واقف متعرى
وحدى وف وش الريح
ندمان ع اللحظه اللى ماكُنتش
باقضيها معاكى
زعلان ع الكلمه اللى فاتتنى
من بر دعاكى
سامحينى يا أمى
ع اللحظه الحلوه اللى ماكُنتش
باقضيها معاكى
صورة أرشيفية
