د. هانى أبو الفتوح يكتب: بَحرْ الوَجَعْ !

بحر الوجع واقف بعيد
وما لهش فَرْحْ
وما لهش عِيد
واقف يعذب فى البلد
من سينا يجرى
لوجه بحرى.. للصعيد
الآة تقولها إسكندرية
الصوت يِرِنْ ف بورسعيد
...........................
كل الوشوش الحزن طالع مِنَّها
رغم إن حُكْمُه راح خلاص انتهى
القصد كان. ......
نفسى أقولِّك كلمتين
بس الزمان. .....
بيقول دا كُلُه سلف ودين
........................
وانتى بقى يا بنت الحلال
إوعاك تقولى الحظ مَال
فين الضفاير اللى كانت
سارحة فوق خد الجميل
فين أحلى بحر
وأحلى ميه وأحلى نيل
فين اللى كانت أُم دنيا
أم اللى عبروا وكَبَّرُوا
ساعة ما عَدُّوا المستحيل
..........................
هو نتى ليه حُبك عذاب
يا حنينة يا أم الضفاير
دايما معاك القلب حاير
قومى افتحى كشف الحساب
شوفى اللى عامل نفسه وطنى
واللى عامل نفسه ثاير
واللى بيقتل فى الشباب
قومى افضحى لؤم اللئيم
واللى عمره فى يوم ما تاب
......................
قومى افضحيهم كلهم
عرى المخبى واللى بان
و اللى يِخَبَّط عالبيبان
و اللى حياتهم كلها
كان اللومان
و اللى أساتذة فى السِباب
........................
قومى افضحى كل اللى فات
هاتى كتاب الذكريات
و عَرَّفِى مين اشتراك
ومين اللى خان
أصل اللى يقتل ف النهاردة
هو اللى قاتلك من زمان
.........................
انتى اللى طمعتينا فيك
طبعك كده دايما مِسَامْحَه
ولو بِيقْطَع فى الوريد
بتقول مصالحة
هى المصالحة بس بوسة وكلمتين
و للا المصالحة أنسى اللى فات
نام عالسرير ومخدتين
وللا المصالحة
خلى النيران جوة الصدور
والحقد لما بْيِمْلَى عِين
..........................
وفى الحقيقة...
دمك بقى عنده رخيص
أصل البعيد ويا الخسيس
لا يهمه موت
ولا همه شعب
ولا همه جبش
وللا البوليس
................
الدم عادى بيشربه
زى السجاير
علشان كده
خليتى قلبى بِمُرُه صابر
يالا افتحى كشف الحساب
يا حنينة وفُكِى الضفاير