بين صمت الأموات.."صبى التربى" يعيش على "النفحات" والعويل يبشره بالرزق

نسمع عن صبى الميكانيكى أو الحلاق أو المكوجى، لكن هل سمعت من قبل عن صبى "التربى"؟.. هو شخص يعيش فى المقابر بين صمت الأموات الذى لا يقطعه سوى وافد جديد يعلن عن قدومه بعويل امرأة على زوجها أو فتاة على والدها، وهو الصوت الذى ينبئ صبى التربى بقدوم الرزق.. ثلاثون جنيها هى أجره على كل دفنه، وحوافزه هى نفحات الزوار التى يوزعونها "رحمة ونور" على الميت.

"رحمة" هو اسم الدلع بتاعى.. يقولها "عبد الرحمن محمد"، صاحب الـ56 عاماً بطرافة لا يعرفها المكان الذى يعيش فيه، لكنه يقول إن النكتة هى الطريقة الوحيدة لتمضية الوقت مع زملاء مهنته بداخل الأحواش قائلاً "أنا مولود هنا فى الترب وطلعت على الدنيا لقيت نفسى بشتغل الشغلانة دى".

يشرح "عبد الرحمن" تفاصيل تلك "الشغلانة": "دورنا إننا نفحت الأرض وندخل الميت فى مدفنه ونريحه، ولما بتيجى الأمانة بنمسكها أنا وواحد تانى من فوق، وفى اتنين بيكونوا تحت بيستلموها وبيريحوها وبيفكولها الرباطات وبيقروا عليها، وبعدين إحنا هنا عايشين وسط المشاهير والفنانين"، مشيرا بيده إلى أحد القبور "ده قبر الشاويش عطية"، قاصداً الفنان "رياض القصبجى".

يلتقط منه أطراف الحديث "مصطفى عيد"، صاحب الـ30 عاماً، والذى يعمل "صبى تربى" أيضاً منذ أكثر من 18 عاماً، قائلاً: "مرتاح فى الشغلانة دى، مفيش أحلى من هدوء الميتين، ومفيش حاجة تخاف منها.. العفاريت وكل الكلام ده حكاوى، من ساعة ما وعيت على الدنيا وإحنا بندفن فى أى وقت مفيش أى حاجة نخاف منها، بس مشكلة شغلانتنا أننا ملناش مصدر رزق ثابت، بنستنى الموت أو الزيارات عشان نعرف نعيش".

وعلى الرغم من هذه العيشة الصعبة التى يعيشها الصبيان، فإن التربى المعلم "متنغنغ" كما يقول "عبد النبى محمد عبد الله" صبى تربى أيضاً بنفس المقابر" التربى بياخد فلوس من الحكومة ومن الزباين أهل الميت، ويجيى يدينا إحنا فتافيت، هو بياخد الفلوس وإحنا بناخد الأمراض من الميتين"، حيث يلجأون أحياناً إلى فتح المقابر بعد مرور أسبوع واحد فقط من دفن أحد الأموات لدفن آخر.

يضيف "عبد النبى": "شيخ الترب بياخد الفلوس من الجمعيات الخيرية غير أن تجارة الترب هنا لصالح التربية، لأن التربى أحياناً لما بتكون فى تربة انقطع نسل أصحابها يفضى العضم أو "الجثة" فى الشارع بيبيعها على أنها فاضية وبيوصل سعرها لـ200 ألف جنيه، وأحياناً لنص مليون، وساعات لما واحد يكون معاه مدفن كبير بيقسموا نصين صاحبه ياخد نصه والنص التانى يبيعه للتربى بـ20أو 30 ألف، ويروح التربى يبيعه بـ150 ألف أو أكتر بعد ما يظبطه على أنه مدفن كامل".