سامح لطف الله يكتب: يا لمونة دوَّخينا

يا لمونة دوَّخينا
فرَّقينا وبعترينا
إوعوا عنها تسألوني
إنشغلتم عنى بيها
إنشغلتم ونستونى
قلتوا ثورة حلم ميت
جوة حلم وعيشوني
والكلام الحلومنكو
صحى قلبى وصحتوني
والسنين بتعدى تجري
ضلمة ليلى ماشفت فجرى
بالأمانى كتفونى
والبحور فاضت طحينة
والعسل والفخفخينا
والكلام مدهون بزبدة
ف الدموع تغرق سفينة
نفسنا ع البر نرسى
نفسنا نلقالنا مينا
يوم م ثرتوا قلتوا عنى
والغُنا يملا المدينة
والرايات شالها الشباب
والكبير سلِّم علينا
يا لمونة دوخينا
سدى بقى وسكتينا
وادى رايتك للشباب
همَّا دول المنقذينا
الأمان ف إيدين ولادنا
مانتى شفتى إيد أخينا
ولاَّ لسه لسه ناوية
ناوية ناوية تدوخينا