طارق ناجح يكتب: إلى أَعَز صَدِيق

إلى أعز صديق ..
أسامه، يا أعز صديق ..
ورفيق مِشوار وطريق ..
ساعة فرح ولعب وضحك ..
وساعة هَمْ وحزن وضيق ..
دى تعَدى، وديه تعدى ..
والعمر بحاله يعدى ..
ما هى هِيَّه دِيَّه حياتنا ..
قَشَّه ما تِنقذش غَريق ..
بِنحاول قَدْ ما نِقدَر ..
فى حياتنا إننا نِتوفَّق ..
وبنِحلم يمكن يوم ..
أحلامنا دى تتحقق
وإن ضاعت زى ما ضِعنا ..
وغِرقت فى بحور أوجاعنا ..
هَنِفضَل برده بنحلم ..
ده الحلم هوشراعنا ..
فى بحر زمان غدَّار ..
هوايتُّه إنه يِضَيعْنَا ..
لكن إحنا مش هَنسلَّم
ونعيش وإحنا بنتألِّم ..
هَنعيش على قَدْ ما نِقدَر ..
نِفرَح .. نضحك .. نتكَلِّم
وإن نِزلت مرَّه دموعنا ..
مُش عيب إننا نتألَّم ..
العيب إن إحنا يا صاحبى ..
لِزمانَّا .. نِخضَع .. ونسَلِّم