لما تحاول تفهم ذاتك كل دقيقة
تقدر تبنى جوة خيوط الحلم حقيقة
تقدر تردم يأسك بين جدران اليأس
تقدر تغزل من افكارك فكرة جريئة
ازرع نخلة يطرح منها دهب وياقوت
تحبل ضِلة نورها ينور ف الملكوت
اكسر كل قواعد شاذة من أفكارك
فتش جوة طموحك تلقى الفرحة تسود
خربش وسط الجهل تلاقى فيك كام آفة
طهّر نفسك قبل ما تظلم أو تتعافى
عَرّف كل الناس عنوانك من أفعالك
خلي ضميرك ويا طباعك يوم يتصافى
ارسم دايرة جوة حدودها تبات الفكرة
خلى الدنيا تحس بقيمتك وتكون فاكرة
حُط مشاعرك تحت مراقبة عقلك دايمًا
وما تحزنشى لو شفت الناس ليك يوم ناكرة
لو يوم عَشش بين أفراحك دمع كتير
اوعى ف يوم تستسلم وامسك ف التغيير
طوٌح كل الهم الراكن جوة ف قلبك
واطوى الصفحة وابنى رصيف للحلم يطير
ورقة وقلم
مشاركة
اضف تعليقاً واقرأ تعليقات القراء
مشاركة
