منى ناصر تكتب: سكة سفرمرسومة فـ بداية الطريق

تصوير بطىء
درويش بيسهر يفتكر فـ الذكريات
عيل بيلعب جوا خانة اليَّك مات
(1)
عيال كتير متجمعين
فاردين اِيديهم للسما
الجرح متجمد أوى
والحُزن فـ عينيهُم نمّـا
مِستنيين المَطرة تنزل ع الأيادى فـ يرتووا
والشوق يدوب
أو يغسلوا الحُزن إللى عشش فـ القلوب
(2)
وسط الطريق
اتنين حيّارى اِتجَمعوا
واحد بيحكى فـ قِصتُه
والتانى قرر يسمعه
فـ يدمعوا
ويضموا بعض بشوق أوى
ويودعه
(3)
بنوته ماشيه
بتُقطف الورد اللى يدبل فـ الطريق
وتوزعه ع المجروحين من غير كلام
أسباب كتير للجراح بتئوول للوجع
أولها قلة لـ اهتمام
(4)
واحد بيصرخ مـ الألم
منكوش شويه أو هدومه مقَطعة
يمكن لُه حد قريبُه مات
يمكن وحيد وبيفتكر فـ الذكريات
يمكن ماعوش التذكره اللى ترجَعُه
يمكن وحيد .. يمكن مريض .. يمكن ماعوش
لأ ده هيموت مـ الشَجن ..
أى شجن هذا اللى يعمل فيه كده !!! ؟
ماسك علم !!!...
شايل كفن ..!!
مكتوب عليه بالدم
" قلبى العليل ميّت هنا أثر الإصابة بالوطن"