بالصور..العثور على جثة شاب فاقوس مذبوحا بعد 10 أيام من خطفه

"ابنى ذنبه أيه عماد معملش حاجة لا قتل ولا سرق ولا زنى، يذبحوه ليه عشان طالب بحقه 600 جنيه عند تاجر نجارة، العصابة خطفته 10 أيام وقتلته فى اليوم الخامس وفضلوا يتصلوا بيَّه، عايزين منى فدية ربع مليون جنيه وأنا راجل فلاح محلتيش حاجة غير الأرض اللى بزرعها وآكل منها أنا وعيالى الستة، أنا عايز أشوف اللى ذبح ابنى، عشان أقطعه بأسنانى ودمه يطرطش على هدومى عشان أرتاح".

ما أصعب دموع الرجال خاصة الفلاح منهم فهذه كانت كلمات "إبراهيم عبد السلام" 61 سنة فلاح مقيم بكفر العطار مركز فاقوس بالشرقية، بعد اليوم الأول من العثور على جثة نجله "عماد" 16 سنة مذبوحا وبه العديد من الطعنات بأرض زراعية بعزبة مجاورة لهم بعد 10 أيام من خطفه لطلب فدية من والده ربع مليون جنيه.

اليوم السابع التقى بأسرة المجنى عليه بمسكنهم بقرية كفر العطار، وكان الحزن يخيم على الأهالى الذين جلسوا على الأرض بجوار المنزل لتقديم واجب العزاء لوالد المجنى عليه الذى يتابع كلامه قائلا: "طول عمرى بشتغل فى الفلاحة وعندى قطعة أرض زراعية وباكل من خيرها وعندى 5 أبناء أكبرهم محمد 17 سنة طالب، وأسامة والمجنى عليه عماد 16 سنة، وطه 14 سنة، وطفل عمره 4 سنوات، وبنت، وعماد له معزة خاصة عندى، وذلك لتعرضه لحادث سيارة من 3 سنوات، وقام على إثر ذلك بإجراء عملية جراحية وشال الطحال وهذا أثر على تعليمه وترك المدرسة وحاول العمل فى ورشة نجارة بقرية مجاورة لنا، لكى يتعلم صنعة يعتمد عليها ويساعد معايا فى تكاليف المعيشة، وكان بيشتغل مع تاجر موبيليا اسمه "تامر" عنده 32 سنة لمدة 3 سنوات، وقبل الحادث بأسبوع عماد ترك الشغل عند تامر وراح يعمل عند واحد تانى اسمه "أحمد الشوادفى"، واتصل على تامر يطلب منه حقه 600 جنيه فرفض، فذهب إليه قبل الحادث بيوم وقال له لو مدتنيش حقى اللى عندك هاروح أنا وأبوى نعمل بلاغ فى المركز وتانى يوم عماد اختفى".

ويستطرد الأب والدموع تنهمر من عينيه: "عماد اشتغل أسبوع فقط عند صاحب الورشة الجديدة، وفى اليوم الثامن اختفى رحت اسأل عليه أحد زملائه، فقال لى إحنا كنا مروحين سوا، وأنا نزلت فى الطريق وعماد كمل لفاقوس، وبعدها قام أهالى القرية بالوقوف بجوارى للبحث عنه، ورحنا سألنا تامر فين عماد، قال هيروح فين ممكن يكون عند حد من أصحابه وهيجى، وفى اليوم الثالث فوجئت باتصال تليفونى من مجهول يطلب منى فدية ربع مليون جنيه، وبيقول لى إن عماد عنده وعرفت أنه خد رقم تليفونى من تامر، ورحت حررت محضر فى مركز شرطة فاقوس ضد تامر اتهمته بخطف ابنى، وعايز الحكومة تقبض على باقى العصابة وتسلمهم لى وأنا أقطعهم بأسنانى، عشان عماد معملش فيهم حاجة".

وتضيف الأم "ناهد.م" 48 سنة ربة منزل "حسبى الله ونعم الوكيل قتلوه ليه هو عماد عمل إيه لا قتل حد ولا سرق ولا عمل حاجة فى حد يذبحوه ليه، طلبت من العصابة يسمعونى صوته" قالوا لى بعينك "ثم تنهمر الدموع من عينيها، ويلتف حولها النسوة بالقرية فى حالة من الصراخ والبكاء، مطالبين بالقصاص وإعدام الجناة.

ويقول "طه" 14 سنة شقيق المجنى عليه "أنه فوجئت أمس باتصال من أحد أقاربه يطلب منه أن يحضر بسرعة لعزبة الشابوكشى، وذلك بعد عثور أحد المزارعين بالعزبة على جثة لشاب مقتولا وسط محصول القمح، رحت بسرعة وبصيت لقيته أخويا ورأسه مفصولة عن رقبته، منهم لله ذبحوه وهو معملش فيهم حاجة خالص، وأنا عايز الحكومة تقبض عليهم وتشنقهم زى ما قتلوا عماد".

ويضيف "محمد العطار" مفتش بالتموين عم المجنى عليه أننا حررنا محضرا بالخطف والشرطة لم تتحرك نهائيا، وعندما قمنا بالتجمع أمام مركز الشرطة، تم القبض على شقيق تامر، فطلبنا من رئيس المباحث القبض على تامر، ومعرفة من القاتل الحقيقى، خاصة أن عماد قتل بعد 5 أيام من خطفه، وظلت العصابة تتصل بوالده تطلب الفدية.

وكان اللواء سامح الكيلانى مدير أمن الشرقية، قد تلقى إخطارا من العميد رفعت خضر مدير مباحث الجنائية يفيد بالعثور على جثة لشاب مذبوحا وسط الحقول الزراعية بعزبة الشابوكشى التابعة لقرية بنى صريط مركز فاقوس.

تبين من التحريات الأولية التى باشرها الرائد إبراهيم لطفى والملازم أول رامز كمال أن الجثة للمدعو "عماد إبراهيم" 16 سنة مقيم بقرية كفر العطار، متغيب منذ 10 أيام ومحرر محضر من قبل أسرته باتهام "تامر.م" 32 سنة صاحب ورشة نجارة بخطفه، تم القبض على تامر للتحقيق معه.

وبالعرض على نيابة فاقوس بتوجيه طارق ليلة مدير النيابة ومحمد حلمى جاد رئيس النيابة بتشريح الجثة لبيان سبب الوفاة وصرحت بالدفن، وطلبت تحريات المباحث حول الواقعة وأمرت بحبس تامر 4 أيام على ذمة التحقيقات.