محمد عمر يكتب: فؤاد وعماد

عماد: شوف يا عم (الشيخ) فؤاد
البداية من جانبكم
افتريتوا ...أنتو ورئيسكم
ياما صرّحتوا بوعود
وبكلام ملهوش وجود
بس ولا نفذتوا كلمة
واحدة... ولا جيتوا ف مَعَاد
فؤاد : مش كده يا ( رفيق) عماد
إنتوا ما صبرتوش علينا
قول كمان ...شَنكِلتوا فينا
لسه كان ما فاتش يوم
وابتديتوا عتاب ولوم
والمشاكل كَت كتيرة
والفساد مالى البلاد
عماد : قلنا هنساعد معاكم
إمشوا واحنا نكون وراكم
بس كَت ليكوانتوحِسبَة
إفتكرتوا مصر عِزبة
تورثوها وتبقى ليكم
راح فساد ونجيب فساد
فؤاد : إنت بتصدّق كلام ...
كدب وسفالة إعلام
أى حاجة بتقولوها...
أى حِجة والسلام
عماد : لأ يا فالح مش كلام
أخونتكم كَت تمام
كُنتوا فاكرينا بهايم
وانتوماسكين اللجام
فؤاد : لأ يا ناصح .. يا هُمام
إنتوعاشقين الحرام
كُنتوا رافضين حكم صالح
كُنتوا رافضين الإسلام
عماد : واحنا يعنى كنا سَحَرة ؟
ولّا يعنى كنا كَفَرة ؟
فؤاد : بس عايزين دُنيا سهرة
تغرقوا ف نسوان وخمرة
عماد : إحنا عايزين الحلال
بس منهجنا اعتدال
فؤاد : بس فيكوحاجات شِمال
واحنا عايزين الكَمال
عماد : وانتوعايزين حكم صالح؟
دا انتوعابدين المصالح
فؤاد : وانتوعابدين البيادة
لَحسها... ليكم سعادة
عماد : بس ما تقولش البيادة
أَكلها ...كان ليكوعادة
فؤاد : إحنا جينا بالانتخاب
وانتودبّرتوا انقلاب
عماد : طب نسيبها للخراب ؟
دا ف سنة شُفنا العذاب
فؤاد : حقنا كان فرصة كاملة
هوا دا أصل المُعاملة
عماد : آه ...نسيب حكم التنابلة
لمّا تقلب حرب شاملة
فؤاد : هية دى ما بقتيش حرب ؟
كل يوم تقتيل وكَرب ؟
عماد : ما انت لما تخش حرب
مش هيبقى بس ضرب
فؤاد : إحنا مش عايزين نحارب
بس لينا أكيد مطالب
عماد : قُوللى مش عايزين نحارب !!
بس بقى شُغل التعالِب !!
فؤاد : بس بقى شُغل التعالب ؟
دا انت مُخك ..صَح ..ضارِب
عماد : يعنى مش بعرف وبسمع ؟
إنتوبتعادوا فى شعب
كل يوم تفجير ورعب
كل يوم ليكم مصايب
فؤاد : واللى مات مِنّا ... هيرجع ؟
اللى ماتوا دُول فى رابعة
فى الحرس ..أوجوا جامعة
يرجعوا ... ونبقى حبايب
عماد : فى الحرس أوعند رابعة
وسط شارع ...جوا جامعة
إبتديتوا بالمواجهة
شعب بالكامل رافضكم
شعب مش عايز رئيسكم
قُلنا تانى .. الشعب يحكُم
تبقى ليكم أولغيركم
إنتوبردوركبتوا راسكم
واستمريتوا ف عنادكم
فؤاد : هوا مش جَه بانتخاب ؟
ولّا نَط من السحاب ؟
عماد : بس بعد الانتخاب
هَبِّب الدنيا بهِباب
فؤاد : إنتوعالَم أفّاقين
عماد : إنتوأكبر كدابين
فؤاد : إنتوشِلة مجرمين
عماد : إنتوإرهابكم لعين
فؤاد : إنتوفاسقين.. سفاحين
عماد : إنتوتُجّار ألف دين
فؤاد : غور بقى امشى...
داهية تاخدك واللى زيّك
عماد : أيوا همشى....
قبل ما أديلك فى وشّك
*************
فؤاد : يا ترى ...إيه اللى جابك ؟
مش هنا هيكون صِحَابك
دى مظاهرة عشان عدوك
فيها إيه ممكن يهمَك ؟
عماد : كنت ف الشارع دا جنبك
وسط كل الناس لَمحتَك
جاى وبَسَلِّم عليك
جاى بطمَّن عليك
فؤاد : جاى تطمًن عليّا
ولّا شمتان أنت فيا ؟
ولّا تتفرّج شوية ...
لو لقيتنى بموت ضحية ؟
عماد : عُمرى ما أشمت لحظة فيك
دا أنت طول عمرك صديق
أى حاجة تجرى ليك
ألقى نفسى بفتديك
فؤاد : وأنت دايما كنت صاحبى
كنت دايما تبقى جنبى
حتى لومش نفس فِكرى
حتى لوشيخ وأنت فَقرِى
عماد: أنت بردو كنت حامى
أوعى تزعل من كلامى
دا أنت أخويا (الشيخ) فؤاد
فؤاد: اوعى تزعل أنت منى
كلمتين كانوا غصب عنى
دا أنت أخويا (رفيق) عماد