هبدأ موضوعى بسؤال لو أنت مِدِّى ميعاد لواحد هتقابله والواحد فعلا راح المكان اللى انتوا متفقين عليه ومستنيك وأنت قدامك اختيارين اتنين بس:
أما أنك توصل متأخر وتتأخر عليه شويه أو إنك متوصلش خالص، إجابتك هتكون إيه؟
نفس الكلام ينطبق على حياتنا عموما يعنى تلاقى للأسف الشديد ناس لو اتأخرت شويه فى حياتها أو محققتش اللى هى عايزاه فى توقيت معين بتنهار وتختار أنها متوصلش.
والسؤال هنا إيه الأقل خسارة إننا نوصل لهدفنا متأخرين شوية أو منوصلش خالص؟
تعالوا نحسبها سوا.. لو وصلت متأخر تبقى نجحت مش لازم النجاح يكون بامتياز يعنى جيد جدا نجاح وجيد برده نجاح فأوصل بأى تقدير.
لو وصلت متأخر هتحس قدام نفسك إن تقصيرك بسيط وإنك حاولت تعالجه وهتكبر فى عين نفسك وشعورك هيبقى كويس.
لو وصلت متأخر هتبقى اتحديت التأخير واتحديت الاحباط وعملت اللى انت عايزه وفى الآخر وصلت.
لو وصلت متأخر جايز جدا تحصل نقلة كبيرة ليك تخليك تعوض التأخير وتوصل فى نفس الوقت اللى كنت بتتمنى توصل فيه.
تعالوا بقى نشوف الناحيه التانية.. انك متوصلش خالص يعنى انك فلشت خالص.
انك متوصلش خالص يعنى انك قصرت تماما ونظرتك لنفسك هتبقى صعبة اوى.
انك متوصلش خالص تبقى فشلت فى اى وكل تحدى قابلك فى حياتك.
انك متوصلش خالص يعنى أنت خسرت كل حاجة وأول الخسارة نفسك.
تفتكروا فى الحالة دى وبعد الشرح ده نختار ايه، نوصل متأخر ولا منوصلش خالص، طبعا لو فى إمكانك انك توصل فى ميعادك وتحقق اهدافك فى ميعادها دى الصوره الأمثل، لكن بتكلم عن إن لو فاتك حاجة قاوم وحاول وحتى لو وصلت متأخر فأنت نجحت، ودائما اطرح هذا السؤال وبداخله ستجد الإجابة.
متأخر ولا متوصلش ؟
صورة أرشيفية
مشاركة
اضف تعليقاً واقرأ تعليقات القراء
مشاركة
