محمد عمر يكتب: بلاش السياسة تنام ع السرير

عَمَلنا ابتكار...
حقيقى كبير
جهاز هيعالجنا... وغيرنا كتير
ملايين مصابة بمرضها الخطير
وتيجى الغباوة وفكر الحمير..
تعامِل عملنا بمنطق حقير

********
واحد راح يقولّك :
ده فِكر المشير
وهوا اللى باشر
وهوا اللى تابع
وهوا اللى جرب
وهوا اللى عالج
ويبقى المشير
بقدرة قدير ...
طبيب الزمان وعالِم خبير
وصوت المشير...
وصورة المشير ....
فى كل البرامج تلعلع... تطير
********
وواحد يقولّك :
تعالج بكفتة؟
يسيب كل حاجة....
ويمسك فى حتة
وعايز يموّه
وعايز يشوّه
وتبقى الحكاية...
زبالة و زفتة
عشان إيه؟ ... سيادته ....
عدّو المشير
و لو شىء يخصه
فى جيشه ....فى شخصه
دا آثم و فاحش و مُنكَر نَكِير
********
بلاش الهزار
و شُغل الصُغار
كفاية خسارة...
كفاية انتحار
وليه السياسة ...
تروح العيادة ؟
وليه السياسة ...
تنام ع السرير؟
عملنا ابتكار ...
دا أحلى انتصار
ومجد وفَخَار
وحاجة عظيمة وتفرق كتير
فى مرضى بيبكوا
فى كل اتجاه
أملهم يخِفوا ...
يعيشوا الحياة
ولما نلاقيلهم طوق النجاة
دا أكبر جهاد... و دا أعلى خير
و يبقى قِدِرنا...
و لو كان شوية
نضيف أى حاجة... للإنسانية
ونقدر نقول ...
دا فينا عقول
تفكر وتبدِع ... تغيّر مصير
*******
بلاش السياسة ...تروح العيادة
بلاش السياسة ... تنام ع السرير.