فيسبوك
واتساب
الندل هيفضل ندل وندالته مستديمة
عمره ما يحكم بالعدل ونيته مش سليمة
يقبلك يضحك فى وشك ومن وراك بالنميمة
حاول تبعد عنه دا البعد غنيمة.
حاول تعيش حياتك لا تزعل ولا تتكدر
وارضى باللى يجيلك دا كل شىء مقدر
واتعلم تصرف العفريت قبل ما تتعلم تحضر
دا لو ما عرفتش تصرفه هيبقى نهارك أغبر.
بكرة يجيلك يوم ما ينفعك مالك
ولا حد يسأل عنك ولا يقولك مالك
وتتحاسب على اللى راح وكمان كل اللى جالك
دا أنت من بعد أمك ما فيش حبيب بقالك.
عجبى على إنسان دايمًا مش راضى بحاله
عمره ما حمد ربنا مهما رزقه واداله
ما لوش خير فى حد حتى اللى رباه وشاله
وفاق وافتكر ربنا لما المرض جاله.
صورة أرشيفية
