أنا مابقتش أحلم..
عشان حلمت من صغرى إنى أتعلم واتخرج من الجامعة
-وادينى اتعلمت واتخرجت من الجامعة- والنتيجة إنى عاطل.
حلمت إنى اتجوز وافتح بيت ضاعت سنين من عمرى وأنا بدوّر على شغلانة كويسة وسنين تانية وأنا بدوّر على شقة ولما جيت اتجوز كان سنى كبر ومفيش بنت كويسة رضيت بيا والمفروض بقى اتجوز يا إما مطلقة أو أرملة أو بنت فاتها قطر الجواز.
حلمت أعمل مشروع صغير على قدى يحمينى من الأيام لما أكبر وميخلنيش محتاج لحد لكن مفيش مشروع نجح معايا عشان انا مش لاقى نفسى فى اى مشروع منهم.
حلمت أعيش فى حالى وماليش دعوة بحد واتجنب المشاكل لقيت المشاكل جاية لحد عندى وغرقت فيها.
أحلام كتير أوى حلمتها وماتحققتش لكن الحلم الوحيد اللى ممكن أموت لو متحققش هو حلمى لبلدى اللى نفسى تبقى أحسن بلد فى الدنيا واللى رغم كل اللى عانيته منها لسه بحبها ومتحملشى عليها أى أذى من حد بلدى دى مش علم ولا اسم دى مكان وتاريخ وأرض ليها أصول وعراقة.
الانتماء يا سادة مش محتاج أسأل نفسى البلد دى اديتنى أيه؟ لأنك لو فكرت لحظة إنك مسيرك تموت وتدفن فى تراب البلد دى وبمرور السنين هتتحول عظامك لتراب من ترابها هتعرف انى التراب ده شىء غالى أوى لازم نحافظ عليه ونحميه.
صورة ارشيفية
مشاركة
اضف تعليقاً واقرأ تعليقات القراء
مشاركة
