م. إيمان الباشا تكتب :عايزين رئيس

عايزين رئيس ابن بلد
يكون معين ويكون سند
رئيس يسيب كرسى الأمير
يبكي على دمعة فقير
وعنيه ماتغمض ع السرير
لو حق ضايع فى البلد
ويرضي ربه والعباد
يا هناه يا سعده اللى انوعد
عايزين رئيس ابن بلد
عايزين رئيس ينحنى لضعف الفقير
يشد ضهره اللى انكسر
من نومه على طرف الرصيف
أو مات يا عينى عشان رغيف
يوجد له مأوى غير القبور
ودوا ولقمة ماهوش كتير
علي ابن مصر اللى شقى
عشان عيونك يا بلد
عايزين رئيس ابن بلد
عايزين رئيس ينزل ويمشى وسط ناسه
يعرف الشىء من أساسه
يشوف بعينه مش بناسه
وفكره جاى من وسط رأسه
ياخد قراره علي أساسه
لا وزير ها ينفع أو يشيل عنك حساب رب البلد
عايزين رئيس ابن بلد
عايزين رئيس على أد مصر
يرسم مكانها ع الخريطة
بخطوط دهب يبنيها حيطة
يصون مكانها مع جيرانها
وسياسته باينة لكن حويطة
وقت الخطر الحيطة سد
عايزين رئيس ابن بلد
عايزينه ناصر والسادات
نبدأ معاه بعد اللى فات
نبنى مستقبل بلدنا
نسابق اليوم والساعات
ع اللى يهد يكون أسدا
عايزين رئيس ابن بلد
عايزين رئيس يفتح بيبانه لكل شعبه
يعرف من ابنه إيه اللى تاعبه
ويساعده وكمان يبقى جنبه
مفيش كلام لو شعبه حبه
لا رياح تشيله وتعزله
ولا يعلى صوت وينزله
وبشعبه هايثبت خطاه
وحبه هايخليه وتد
عايزين رئيس ابن بلد
عايزين رئيس ابن بلد